Girjjálašvuohta

Váldo váikkuhangaskaoamit maiguin joksá girjjálašvuođapolitihka ulbmiliid leat Kulturráđi sisaoastinortnegat, lassiárvodivvaga luvven ja buhtadus go geavaha čállosiid girjerájusmávssu bokte. Lassin daidda, de juolluduvvojit stáhtalaš doarjagat máŋggalágan gaskkustandoaibmabijuide ja stipeanddat girječálliide.

Kulturráđđi oastá čállagiid juohke jagi ja almmuha daid almmolaš girjerádjosiid bokte. Sisaoastinortnegat, movttiidahttinruđat, ja girjerádjosiid iežaset sisaoastimat dahket stuora oasi Norgga čáppagirjjálašvuođa ja dábálaš áššeprosa gávppašeamis. Lea hui mávssolaš oažžut girjjiid viidát leavvat vai dađistaga olaha ođđa lohkkiid, muhto lea maiddái dáiddapolitihkalaš váikkuhangaskaoapmi.

Dakkár girjjálašvuođa vuogádat lea ovdánan go iešguđetlágan bealálaččat leat ovttasbargan, ja lea čájehuvvon ahte buvttaduvvon nanu ja máŋggabealat girjjálašvuohta. Girjjálašvuođa nanu sajádat Norggas gullá oktii dáinna girjjálašvuođa vuogádagain.

Girjeláhka

Njukčamánu 31. beaivvi 2023 ovddidii ráđđehus ođđa girjeláhkaárvalusa Stuoradiggái. Geassemánu 12. beaivvi 2023 gieđahalai Stuorradiggi girjelága nuppes, ja lea dasto loahpalaččat mearriduvvon.

Láhkaárvalusas bohtet ovdan daid maŋemus jagiid stuora rievdamat teknologiijas ja olbmuid lohkandábiin. Dat boahtá gustot buot suorggi aktevrraide ja nanne stuora oasi sisdoalus gustovaš girješiehtadusas, mii lea gaskal Bokhandlerforening (Girjegávpesearvvi) ja Forleggerforening (Lágádussearvvi), ja dasa lassin vel lasihuvvojit ođđa geatnegasvuođat. Láhka dásse maiddái daid iešguđetlágan aktevrraid beroštumiid ja boahtá addit vuorddehahtti ja dássedis rámmaeavttuid girječálliide, lágádusaide ja girjegávppiide. Viidáseappot veahkeha girjeláhka oažžut máŋggabealat aktevrraid dainna lágiin ahte lágádusat ja girjegávppit iešguđet sturrodagas ja ovttastusgullevašvuođas ožžot seamma dássásaš gilvalaneavttuid.

Girjelága vuođus lea fásta haddi juohke ođđa girjji almmuhanformáhttii, nugo ovdamearkka dihte čadnon girjái, pocketgirjái, e-girjái ja jietnagirjái. Fástahatti bidjá lágádus ja dat gusto 12 mánu dan rájes go girjji formáhtta almmuhuvvo vuosttáš geardde. Fásta haddi sihkkarastá maid smávva báikkiid girjegávppiid, gos muđui ii gánnáhivčče vuovdit girjjiid. Girjegávppiid rolla leat čájáhuslásen ja kulturaktevran, mas leat girječálliidčoahkkimat ja aktiivvalaš lohkkiidrekruteren, ja maid neahttagávpi ii sáhte buhttet.

Girjelágain galgá maid šaddat álkit oažžut daid ođđaseamos jietnagirjjiid fástahaddeáigodagas, go rávdnjebálvalusat galget maid fállat jietnagirjjiid gáhppálatvuovdimiin. Jietnagirjjiid johttu lea lassánan hirbmosit daid maŋemus jagiid, muhto dássážii eai leat buot jietnagirjjit leamaš gávdnamis daid iešguđetlágan rávdnjebálvalusain. Válljenmunni lea rievddadan bálvalusas bálvalussii. Dat ođđa láhka dagaha ahte buot girjjit galget leat álkit gávdnamis, maiddái dat main lea fásta haddi. 

• Høring av forslag til ny boklov - regjeringen.no (dušše dárogillii)

Lohkanhállostrategiija

Norgga álbmot, earenoamážit mánát ja nuorat, lohket unnit go ovdal. Ráđđehus háliida jorgalahttit dan treandda, go fuomášuhttá lohkanhálui ja lohkanmovtta. Lohkanhállostrategiija barggu bokte háliida ráđđehus oaččuhit lohkankultuvrra, vai lohkan šaddá juoga mii addá ilu olles eallinagi.

Kultur- ja dásseárvodepartemeanta ja máhttodepartemeanta ovttasbarget lohkanhállostrategiijan. 

• Om arbeidet med leselyststrategien - regjeringen.no (dušše dárogillii)