Áigeguovdilis njuolggoliŋkkat

    Filmmat ja mediat

    Sádden álbmogii (kringkasting) ja audiovisuála diŋgonbálvalusat

    Artihkal | Maŋimuš ođasmahttojuvvon: 11.07.2024 | Kultur- ja dásseárvodepartemeanta

    Áibmomedia (kringkasting) mearkkaša rádio ja tv sádden mas lea guovddážis ahte álbmot sáhttá vuostáiváldit sáddagiid njuolga ja oktanaga. Audiovisuála diŋgonbálvalusat mearkkaša earret eará bálvalusat man váldoulbmil lea fállat prográmmaid maid sáhttá geahččat goas ieš vállje.

    Áibmomedialáhka

    Áibmomedialáhka mudde sáddema álbmogii ja audiovisuála diŋgonbálvalusat leat. Áibmomedia- ja audiovisuála diŋgonbálvalusláhka oktan láhkanjuolggadusaiguin lea Kultur- ja dásseárvodepartemeanttas ovddasvástádus.

    Láhka sisttisdoallá earret eará mearrádusaid lobi hárrái doaimmahit áibmomedia (konsešuvdnageatnegasvuohta), ja njuolggadusaid audiovisuála diŋgonbálvalusaide, reklámii, ruhtadoarjagiid ja buvttafálaldagaid ja jođásneahttasáddagiiddda, gaskkustangeatnegasvuhtii ja bajitdási mearrádusaid NRK organiseremii. Ovddasvástádus hálddašit áibmomedialága lea eanas delegerejuvvon Mediatilsynet (Mediabearráigehččui).

    Sáddehatláhka lea buori muddui ásahuvvon riikkaidgaskasaš reguleremiid vuođul, erenoamážit audiovisuála mediabálvalusaid direktiivva 2010/13/EU (AMT-direktiivva) vuođul. AMT-direktiiva regulere earret eará TV ja audiovisuála diŋgonbálvalusaid sisdoalu ja márkanfievrredeami. Kultur- ja dásseárvodepartemeanta sáddii čakčamánu 16. beaivvi 2022 gulaskuddamii evttohusa AMT-direktiivva ((EU)2018/1808) rievdadusaid čađaheami birra Norgga riektevuogádagas. Cealkámušaid áigemearri lei juovlamánu 16. beaivi 2022. Departemeanta lea dál ráhkadeame láhkaproposišuvnna mas evttohuvvo dohkkehit rievdadusdirektiivva Norgga láhkii.

    Álbmotsáddehat

    Norggas lea mis almmolaš sáddehatdoaimmahat (NRK). TV2 lea dahkan soahpamuša stáhtain fuolahit kommersiála álbmotsáddehatbálvalusaid TV bokte, mii loahppá juovlamánu 31. beaivvi 2023.

    Departemeanttas lea ovddasvástádus Norsk Rikskringkasting (NRK) eaiggátstivrejumi hárrái. NRK ruhtaduvvo njuolga stáhtabušeahta juolludeami bokte. NRK geatnegasvuohta lea fállat almmolaš sáddehagaid sihke rádio, TV ja interneahta bokte. NRK almmolaš sáddehatgeatnegasvuohta lea mearriduvvon NRK-plakáhtas ja NRK njuolggadusain.

    NRK lea organiserejuvvon oasussearvin man stáhta oamasta ollásit. Kultur- ja dásseárvodepartemeanta kultur- ja dásseárvoministara bokte lea NRK generálačoahkkin. Dollojuvvo dábálaš generálačoahkkin geassemánus juohke jagi. Proposišuvnnas 1 S (2022-2023) (regjeringen.no - dušše dárogillii) ovdanbuvttii ráđđehus NRK-plakáhta rievdadusaid ja árvalii njealji jagi ekonomalaš stivrensignála NRK hárrái. Stivrensignála guoská áigodahkii 2023-2026.

    TV 2 fállá šiehtadusa bokte stáhtain kommersiála almmolaš sáddehatbálvalusaid TV bokte áigodagas 2019-2023. Buhtadus lea gitta 135 miljovnna kruvnno jahkái, oktan govttolaš badjebáhcagiin. Almmolaš sáddehatdoaibma sisttisdoallá geatnegasvuođa ieš buvttadit riikkaviidosaš ođasprográmmaid guovddáš ođasdoaimmahaga olis, ja dárogielat prográmmaid mánáide ja nuoraide, ja doaimmahit Norgga filmmaid ja TV-drámáid vuosttaščájeheami. Gáibiduvvo maiddái ahte váldodoaimmahat ja guovddáš ođasdoaimmahat galget leat unnimusat 100 km olggobealde Oslo guovddáža. TV2 lea válljen sajáiduhttit iežas doaimma Bergenii. TV2 galgá gaskkustit iežas almmolaš sáddagiid lineára TV-kanála bokte ja ii-lineára lávddis.

    Kultur- ja dásseárvodepartemeanta dieđihii stáhtabušeahta 2023 teakstaoasis ahte áigu rabasin almmuhit kommersiála almmolaš TV-sáddehatdoaimma šiehtadusa ođđa áigodahkii ođđajagemánu 1. beaivvi 2024 rájes. Dat almmuhuvvui departemeantta neahttasiidduin njukčamánu 27. beaivvi 2023 oktan ohcanáiggiin 2023 mielde.

    Rádio

    Mearrádus digitaliseret rádio

    Rádio digitaliseren lea aktevrraid čađahanproseassa.

    Stuoradiggi dohkkehii stuora eanetloguin 2011:s digitáladieđáhusa eavttuid maid mielde riikkaviidosaš kanálat besse heaittihit iežaset FM-sáddagiid.

    2015:s nannii ráđđehus, Mediabearráigeahču ja Nasjonal kommunikasjonsmyndighet (Nkom) raporttaid vuođul, ahte dát eavttut leat devdojuvvon ja ahte rádiomedia digitaliseren sáhttá čađahuvvot jagi 2017 mielde. Riikkaviidosaš sáddehagat NRK, Radio Norge ja P4 mearridedje 2015:s ahte sii áigo regiovnnaid mielde heaittihit iežaset FM-sáddagiid 2017 mielde.

    Stuoradiggedieđáhusa olis báikkálaš rádio birra  ožžo birrasiid 215 báikkálaš  rádiodoaimmahusa 2016:s fálaldaga nuvttá guhkidit FM-konsešuvnnaid vihtta jagi seammás go FM-sáddema eavttut bokte ložžejuvvojedje.

    FM-konsešuvnnat main lea mearkkašahtti viidodat dan njealji stuorámus gávpogis eai guhkiduvvon, eai ge almmuhuvvon ođđasis maŋŋel 2016. Mediabearráigeahču jagi 2019 raportta «FM etter 2021» vuođul dohkkehii departemeanta Prop. 1 S (2019-2020) bokte ahte báikkálaš rádiot dárbbašedje guhkit áiggi nuppástuhttit sáddagiid digitála hápmái. Báikkálaš jietna- ja govvamediaid doarjjaortnet rievdaduvvui danne nu ahte addá vejolašvuođa juolludit doaibmadoarjaga  báikkálaš rádio digitaliseremii ja ahte oppalaš doarjjamearri lasihuvvo 1,5 miljovnna kruvdnui jahkásaččat guđege doaimmahussii. Dasto guhkiduvvoje báikkálaš rádioid FM-konsešuvnnat viđain jagiin, áigodahkii 2022-2026. Lea plánejuvvon ahte báikkálaš rádiot sáhttet sáddet FM bokte 2031 rádjái.

    Konsešuvnnat

    Sáddehatlága mielde lea NRK:s vuoigatvuohta doaimmahit mediasáddehagaid. Earát go NRK dárbbašit konsešuvnna doaimmahit mediasáddehagaid dahje báikkálaš sáddehagaid mat mannet jođaskeahtes sáddenrusttegiid bokte eatnamis.

     Mediabearráigeahčču juohká konsešuvnnaid báikkálaš ja digitála sáddehatdoaimmaide. Eambbo dieđuid dan birra gávdná Mediabearráigeahču neahttasiidduin.

    Áigeguovdilis liŋkkat

    Bajás