Stáhtabušeahtta 2025:
400 miljovnna ruvnno psyhkalaš dearvvašvuhtii ja gárrendillái
Ođas | Almmustahtton: 08.10.2024 | Dearvvašvuođa- ja fuolahusdepartemeanta
Ráđđehus evttoha 400 miljovnna ruvnno jagi 2025 stáhtabušeahtas čuovvulit psyhkalaš dearvvašvuođa viiddidanplána ja gárrensuorggi eastadan- ja dikšunođastusa mii lea boađi boađi.
– Psyhkalaš váttut ja givssit leat min stuorámus álbmotdearvvašvuođa hástalusaid searvvis. Mii háliidit ahte eanebut galget vásihit buori psyhkalaš dearvvašvuođa ja eallinkvalitehta, ja ahte veahkki galgá leat buorre ja álkit olámuttos sidjiide geat dan dárbbašit, dadjá dearvvašvuođa- ja fuolahusministtar Jan Christian Vestre.
Ráđđehus lea ovddidan psyhkalaš dearvvašvuođa buoridanplána ja ovddida fargga eastadan- ja dikšunođastusa gárrensuorggis.
– Mii vuoruhit psyhkalaš dearvvašvuođa ain eambbo dáinna bušeahtain ja dássážii leat mii lasihan áŋgiruššama badjel 1 miljárdda ruvnnuin plánaáigodagas, dadjá Vestre.
Evttohuvvo ahte 400 miljovnna juogaduvvo ná jagis 2025:
- 150 miljovnna ruvnno suohkaniid rámmadoarjjan nannen dihte vuosttašceahkkebálvalusaid
- 100 miljovnna ruvnno sihkarvuođapsykiátralaš doaibmabijuide nugo dorvoruovttuid ásaheapmái, mii lea dan lasáhusa bisuheapmi mii bođii jagi 2024 reviderejuvvon nationálabušeahtas.
- 36 miljovnna ruvnno johtti sihkarvuođajoavkkuid ásaheapmái
- 37 miljovnna ruvnno iežasoasi sihkkumii pasieanttaide geat leat psyhkalaš dearvvašvuođasuddjemis ja fágaidrasttideaddji spesialiserejuvvon gárrendilledikšumis (FSD, dárogillii tverrfaglig spesialisert rusbehandling – TSB) gitta dassážii go devdet 25 jagi
- 7 miljovnna ruvnno nuvttá guhkitáiggeváikkuheaddji prevenšuvdnii nissoniidda FSD:s
- 45 miljovnna ruvnno iešguđetlágan árvvoštallanságastallamiidda árra čielggadanjoavkkuin daidda geat leat čujuhuvvon psyhkalaš dearvvašvuođadikšumii
- 25 miljovnna ruvnno psyhkalaš dearvvašvuođa ABC-kampánjjaide
Psyhkalaš dearvvašvuođa buoridanplána (dárogillii) guoská olles álbmogii ja deattuha erenoamážit mánáid ja nuoraid. Áigumuš lea lasihit juolludemiid psyhkalaš dearvvašvuođasuorgái 3 miljárdda ruvnnuin plánaáigodagas. Plánas leat golbma stuora áŋgiruššansuorggi:
- Dearvvašvuođaovddideaddji ja eastadeaddji psyhkalaš dearvvašvuođabargu
- Buorit bálvalusat doppe gos olbmot ásset
- Fálaldat olbmuide geain leat guhkilmas ja máŋggabealat dárbbut
Ráđđehusa ulbmil lea ovddidit eastadan- ja dikšunođastusa gárrensuorggis jagis 2024.
– Ođastusain áigu ráđđehus eastadit gárrenávnnasváttisvuođaid buorebut ja fállat buori veahki, divššu ja čuovvoleami árabut, dadjá Vestre.