75 miljovnna báikkálaš ja regiovnnalaš kultureallimii

– Mii sávvat ja doaivut ahte dát sáhttá  váikkuhit dasa ahte ásahuvvojit eambbo ja buoret kulturfálaldagat riikka buot regiovnnain. Fylkkat leat hui iešguđetláganat geografiija, demografiija ja kulturfálaldagaid dáfus. Vái dát ruđat buoremusat heiveše báikkálaš ja regiovnnalaš dárbbuide, háliidit mii addit fylkkagielddaide stuora mearridanválddi doarjagiid almmuheamis ja juolludeamis, lohká kultur- ja dásseárvoministtar Lubna Jaffery.

Dát šaddá ođđa lávdaduvvon doarjjaortnet máŋgga kultursuorggis gos ulbmiljoavkun leat sihke eaktodáhtolaš ja ámmátlaš kulturaktevrrat.

Dat 75 miljovnna regiovnnalaš kulturfoanddaide boahtá fylkkagieldda rámmadoarjaga ja friddja sisaboađuid lassin.

– Ráđđehus háliida ahte dáiddárat galget sáhttit ásaiduvvat vaikko gosa min riikkas, ja ahte olbmuin galgá leat dáidda ja kultuvra olámuttos doppe gos ásset. Mun sávan dát dorjjošii vel eanet álgagiid ja ovttasbarggu báikkálaš áŋggirdeddjiid, ealljáris amatevrraid ja ámmátlaš dirigeanttaid, neavttáriid ja dáiddáriid gaskka, ja ahte dat buvttášii buriid kulturvásáhusaid smávváide ja stuorráide, lohká Jaffery.

Ulbmilin lea ahte regiovnnalaš kulturfoandda ortnet almmuhuvvo ohcanláhkái juo 2025:s.

Ráđđehus árvala ahte ruhta juogaduvvo ná:

Fylkkagielda	Supmi (1 000 ruvnno)
Østfold	4 327
Akershus	7 727
Oslo	7 574
Buskerud	4 108
Innlandet	5 404
Vestfold	3 854
Telemark	3 363
Agder	4 534
Rogaland	5 908
Vestland	7 423
Møre ja Romsdal	4 110
Trøndelága	6 154
Nordlánda	4 163
Romsa	3 428
Finnmárku	2 923
Oktiibuot	75 000