Bargu ovddasvástideaddji investeremiid ovdii nannejuvvo

Ráđđehus áigu nannet Stáhta olgoriikka penšuvdnafoandda ovddasvástideaddji investeremiid. – Ráđđehusa mielas lea mávssolaš, ahte min oktasaš seasttuid hálddašeamis galgá leat rabasvuohta ja etihkalaš dihtomielalašvuohta. Mii ásahit ođđa sorjjasmeahttun áššedovdiráđi, mii ráhkada almmolaš árvvoštallama ovddasvástideaddji investeremiid hárrái, ruhtadanministtar Siv Jensen dadjala.

Dieđáhusas Stáhta penšuvdnafoandda birra Ráđđehus ovddida plánaid, maid mielde čohkket Norgga báŋkui gaskaomiid, mat gusket ovddasvástideaddji investeremiidda. Nuba báŋku váldáge badjelasas ovddasvástádusa fitnodagaid dárkumis ja hilgumis.

Ulbmilin lea oažžut ollislaččat strategiija ja doaibmagaskaomiid buoret ovttasdoaibmama. Fitnodagaid sirrema njuolggadusat eai rievdaduvvo ja dat šaddet Norgga Báŋkku bargoviidodaga oassin. Dieđáhusas Ráđđehus almmuha, ahte álggahuvvojit eanet doaimmat, maiguin sihkkarastet, ahte etihkalaš barggus lea legitimitehta hálddašeames.

- Mii áigut nannet legitimitehta ja sihkkarastit, ahte ovddasvástideaddji investeremiid čalmmustahttet, danin mii ásahit sorjjasmeahttun áššedovdiráđi, mii árvvoštallá mo báŋku lea deavdán rollas ovddasvástideaddji investerengeavada oktavuođas, ruhtadanministtar Siv Jensen dadjala. Ráđđi galgá ovddidit almmolaš raporttain iežas árvvoštallamiid, ja departemeanta bargá daid vuođul viidáseappot Stáhta olgoriikka penšuvdnafoandda hálddašemiin.

Dasto láhččojuvvo dan láhkai, ahte Norgga Báŋku galgá almmolaččat cealkit ja vuođuštit fitnodagaid hilguma etihkalaš sujaid geažil. Ovddasvástideaddji investeremiid bargoprinsihpat ja eaiggátvuođa ollašuhttima strategiijat galget almmustahttojuvvot, ja báŋku galgá raporteret eaiggátvuođabarggustis ja gaskaomiid geavaheames, ja gulahallat dan olis ovttaskas fitnodagaiguin. – Norgga Báŋkkus galgá leat olámuttos sorjjasmeahttun olggobeale áššedovdiid veahkki go sii barget fitnodagaid sirremiin bargoviidodaga kriteraid vuođul, ruhtadanministtar Siv Jensen lasihastá.

Norge ásahii árrat hálddašeami etihkalaš njuolggadusaid. Go njuolggadusat ásahuvvojedje 2004, de oaivvildedje máŋgasat daid buoremus geavadin. Etihkkaráđđi, Norgga Báŋku ja Ruhtadandepartemeanta leat maid háhkan gelbbolašvuođa ja vásáhusaid goasii logi jagi dan rájes, go njuolggadusat bohte fápmui.

Norgga Báŋku ja Etihkkaráđđi leat bargguset bokte ožžon riikkaidgaskasaš ánssu. – Lean vuohttán, ahte foandda barggu ovddasvástideaddji investeremiid ovdii čuvvot ollu penšuvdnafoanddat, fitnodagat ja earát, geain lea beroštupmi biras- ja servodatlaš beliin fitnodagain. Rievdadusat, maid mii dál ovddidit, dahkkojuvvojit daid resurssaid ja gelbbolašvuođa vuođul, maid mii leat čohkken, ruhtadanministtar Siv Jensen cealká.

Ovddasvástideaddji investerengeavat lea suorgi, mii rievdá dađistaga. Sihke njunušgeavada áddejupmi ja eará riikkaidgaskasaš aktevrraid bargu lea rievdan ollu 2004 rájes. Ođđajagemánus 2013 attiige Ruhtadandepartemeanta mandáhta Stáhta olgoriikka penšuvdnafoandda strategiijaráđđái, mas bivde árvvoštallat mo sáhttet nannet barggu ovddasvástideaddji investeremiid ovdii, ja mo resurssaid ja gelbbolašvuođa buoremusat sáhttá geavahit. Strategiijaráđi raporta geigejuvvo čakčat 2013 ja lea leamaš gulaskuddamis.

Strategiijaráđđi, masa serve suorggi riikkaidgaskasaš ja norgga áššedovdit, lea geahčadan maid mii sáhttit oahppat sihke eará stuorra foanddaid geavadiin ja ovddasvástideaddji investeremiid dutkamis, ja lea árvvoštallan dálá vuogádaga. Ráđđi ovddidii logi ávžžuhusa mo ovddasvástideaddji investeremiid barggu sáhttá nannet. Strategiijaráđđi oaivvilda ávžžuhuvvon doaimmaid sihkkarastit, ahte foanda ain adnojuvvo riikkaidgaskasaš njunušin ovddasvástideaddji investeremiid suorggis. – Strategiijaráđđi ovddidii buriid jurdagiid das mo resurssaid geavaheami ja barggu beaktilvuođa sáhttá nannet, ja mii čuovvolit ávžžuhusaid. Máŋgga gulaskuddancealkámušas deattuhuvvui rabasvuohta ja ahte etihkalaš hálddašanbargu fuomášuvvo doarvái. Dan mii leat maid háliidan váldit vuhtii rievdadusain, maid mii dál ovddidit, ruhtadanministtar Siv Jensen dadjala.

________________

Loga eanet:

• Preassadieđáhus 13/2014: Stáhta penšuvdnafoandda hálddašeapmi ovddiduvvo ain
• Meld. St. 19 Forvaltning av Statens pensjonsfond 2013 (St.dieđ. 19 Stáhta penšuvdnafoandda hálddašeapmi 2013)
• Preassakonferánssas čájehuvvon dieđut
• Neahtta-TV preassakonferánssas