Doaktárat eai galgga čujuhit abortii

Fástadoaktárat eai galgga šat nissonolbmuid čujuhit dahkat abortta. Ráđđehus ja Kristtalaš Álbmotbellodat leat soahpan sihkut dán ortnega.

-Mii árvalat dakkár ortnega mii vuhtiiváldá abortaohcci vuoigatvuođaid ja doaktáriid geat oamedovddu geažil eai sáhte čujuhit nissonolbmuid dahkat abortta, cealká dearvvašvuođa- ja fuolahusministtar Bent Høie.

Nissonolbmot sáhttet dál ieža gáibidit abortta. Ja dalle ii leat dárbu čujuheami doaktáris. Ođđa árvalus mearkkaša ahte fástadoaktáris ii leat makkárge rolla abortta dahkama hárrái. Ja dalle ii fástadoavttir sáhte biehttalit ge.

Buot fástadoaktárat galget váldit vuostá ja veahkehit nissonolbmuid geat árvvoštallet dahkat abortta. Nissonolmmoš galgá oažžut iskkadeami ja dieđuid maid son dárbbaša. Son galgá oažžut bagadallama ja geavatlaš veahki movt gáibidit botket áhpehisvuođa buohcceviesus dahje nammagotti ektui.

Nissonolbmot geat háliidat galget beassat váldit oktavuođa njuolga buohcceviesuin dahkat abortta. Dan sii dál juo sáhttet.

-Divaštallamat árvalusa birra mii lea leamaš gulaskuddamis leat duođaštan ahte dálá ortnet ii doaimma. Danne ovddidan maiddái doaibmabijuid vai ortnet doaibmá njuovžileabbo, cealká Høie.

Árvalus čielggasmahttá ahte fástadoaktáris ii leat vejolaš biehttalit bidjamis spirála, čálihit p-pilláid dahje čujuhit oažžut veahkkecahkkehusa.

Maiddái boahtá čielgasit ovdan ahte lea gielddaid ovddasvástádus bearráigeahččat ahte fástadoaktárat eai rihko njuolggadusaid.

Maiddái čilgejuvvo makkár bargodoaimmat fástadoaktáriin leat oktasašlisttuid hárrái.

Nissonolbmot geat dárbbašit rávvagiid ja bagadallama abortadahkama hárrái galget beassat čuojahit ruoná telefovdnanummirii. Bálvalus galgá bagadit nissonolbmuid guovdilis buohccevissui dahje ráđđeaddibálvalussii jos son dan háliida.

Árvalus sáddejuvvo gulaskuddamii ja cealkináigemearri lea čakčamánu 15.beaivve. Departemeantta áigumuš lea fápmudahttit njuolggadusaid ođđajagimánu 1.b.2015.

Dearvvašvuođa- ja fuolahusdepartemeanta lea ávžžuhan Stáhta dearvvašvuođabearráigeahčču čađahit heivvolaš bearráigeahču čakčat 2016 gielddaid ja fástadoaktáriid fálaldagaid birra nissonolbmuid ektui geat árvvoštallet dahje háliidit gaskkaduhttit áhpehisvuođa, ja dáhpáhuvvet go lobihis várašumit.

Ráđđehus ja Kristtalaš Álbmotbellodat leat soahpan ahte ráđđehus nammada almmolaš lávdegotti guorahallat movt jurddavuoigatvuohta ja osku- ja oamedovddolašfriddjavuohta buoremus lági mielde sáhttá vuhtiiváldojuvvot bargodoaimmaid oktavuođas norgga bargoeallimis oppalohkái.

Loga ráđđehusa ja Kristtalaš Álbmotbellodaga gaskasaš šiehtadusa biehttalanortnega birra (pdf)

Loga gulaskuddanárvalusa movt sihkut čujuhanortnega aborta dahkama jna. birra (pdf)