Čalmmustahte sámi giellavahkku 2024!
Preassadieđáhus | Almmustahtton: 21.10.2024 | Gielda- ja guovlodepartemeanta
Golggotmánu 21. - 27. beivviid lágiduvvo sámi giellavahkku. – Gielda- ja guovlodepartemeanta lea rámis go beassá čalmmustahttit giellavahkku ja min sámi giellagirjáivuođa. Ovttas mii váldit ovddasvástádusa fuolahit ahte sámegielat geavahuvvojit buot servodatsurggiin, dadjá gielda- ja guovloministtar Erling Sande.
Giellavahkku lea oassin Sámedikki guhkesáiggi giellaáŋgiruššamis man ulbmil lea nannet sámegielaid ja loktet gielaid árvvu. Mii bargat álbmogassii čalmmustahttit sámegielaid ja lasihit máhtu sámegielaid birra olles servodagas.
Miehtá vahkku lágiduvvojit iešguđetlágan doaimmat miehtá riikka, ja buohkat leat bures boahtin searvat.
Sámi giellavahkku lea dehálaš sámegielaid čalmmustahttimii ja máhtu lasiheapmái sámegielaid birra olles servodagas. Ráđđehusa ulbmil lea ahte sápmelaččat galget beassat ovddidit gielaset, kultuvrraset ja servodateallimeaset.
− Norgii lea deaŧalaš ja mávssolaš áimmahuššat sámegielaid, sámi kultuvrra ja árbevieruid. Sámegielaid ovddidanbarggus háliida ráđđehus váikkuhit buori ovttasbargui riikkarájiid rastá. Sámi giellavahkku lea buorre doaibma joatkit dán barggu, dadjá Sande.
Giellavahkku oktavuođas geigejuvvo maiddái Gollegiella - Davviriikkalaš sámi giellabálkkašupmi Oslos golggotmánu 22. b. Giellabálkkašupmi geigejuvvo ovttaskas olbmuide dahje organisašuvnnaide mat leat áŋgiruššan ovddidit sámegielaid.
Sámi áššiid vástideaddji ministarat Norggas, Ruoŧas ja Suomas ja dáid riikkaid sámediggepresideanttat dat leat ásahan Gollegiella - Davviriikkalaš sámi giellabálkkašumi.
Buorre giellavahkku! Buorre giellavahkko! Buerie gïele våhkoe!