Jagi 2024 nuorra boazodoalli lea Johan Máhtte Eira

– Johan Máhtte Eira ánssáša bálkkašumi. Mii eat birgeše nuorra boazodolliid haga geat háliidit doaimmahit boazodoalu ja geain seammás lea dáhttu joatkit ja ovdánahttit boazodoalu buorren birgenláhkin, lohká eanandoallo- ja biebmoministtar Geir Pollestad.

Jagi nuorra boazodoalli bálkkašumi ulbmil lea fuomášuhttit ja gudnijahttit boazodoalli gii iežas ealáhusdoaimmain ja beroštumiin lea nannen ja ovddidan boazodoalu positiiva vugiin.

Dán bálkkašumi addet Eanandoallo- ja biebmodepartemeanta, Norgga Boazosápmelaččaid Riikkasearvi (NBR) ja Bohccobierggu márkanlávdegoddi. NBR nuoraidlávdegoddi lea ovddidan evttohasaid jagi bálkkašupmái.

Jury ákkastallan

Boazodoalloealáhusas lea olu nuorra ja áŋgiris boazobargit geat bures ovddastit ealáhusa. Sii nannejit ja loktejit boazodoalu iešguđetge vugiiguin. Soapmásat barget politihkalaččat, ja earát ges atnet sosiála mediaid iežaset arenan. Dán jagi vuoiti ii leat nu olu dien arenain. Su arena lea boazomeahcci.

Nuorabun lei son jaskat ja hudju. Dassážii go boazoságat buollájedje. De gal ii šat nagodan orrut jaska. Su boazodoalloberoštupmi lea leamaš čielggas ja nanus.

Dán jagi nuorra boazodoalli lea dahkan soames dihtomielalaš ja čielga válljejumiid. Son háliida eallit boazodoallin, ja dat lea su bargu, eallinvuohki ja su stuorámus beroštupmi. Su vuosttašvuoruheapmi lea boazu ja dat mii bohccui lea buoremus. Vuoitis lea stuora beroštupmi ja duogáš árbevirolaš boazodoalus, muhto son seammás geahččá ovddos guvlui ja atná deaŧalažžan viidáseappot doaimmahit ja ovdánahttit boazodoalu ceavzilis ealáhussan.

Su háliidus lea bohccuiguin bargat ja boazodoalus háhkat birgenlági.  Son lea iežas boazobarggu, máhtu ja vásáhusa dáfus buorre ovdamearkan boahtteáiggi boazodolliide.