Boazodoalu gearggusvuohta doaibmá bures
Ođas | Almmustahtton: 09.11.2022 | Maŋimuš ođasmahttojuvvon: 10.11.2022 | Eanadoallo- ja biebmodepartemeanta
Bargojoavku, mas leat ovddasteaddjit boazodoalus ja hálddahusas, oaivvilda ahte gearggusvuođa vuogádat boazodoalus doaibmá bures, ja stuorit rievdademiide ii leat dárbu.
Šiehtadallanbealit sohpe 2022/2023 Boazodoallošiehtadusa oktavuođas ásahit bargojoavkku geahčadit boazoealáhusa gearggusvuođa. Sii galge earret eará árvvoštallat movt gearggusvuođalávdegottit doaibmet ja movt gearggusvuođa njuolggadusat ja vuogádagat leat doaibmán maŋimuš guohtunroasus.
Bargojoavkkus leat leamaš mielde áirasat Norgga Boazosápmelaččaid Riikkasearvvis ja Eanadoallo- ja biebmodepartemeanttas (EBD), ja stáhtahálddašeaddjis Romssas ja Finnmárkkus, stáhtahálddašeaddjis Nordlánddas ja stáhtahálddašeaddjis Trøndelágas. Eanadoallodirektoráhta ja EBD leat leamaš čállingoddi. Raporta almmuhuvvui Álttás skábmamánu 7.beaivve gearggusvuođalávdegottiid jahkásaš oktasaščoahkkimis.
Raporttas boahtá ovdan ahte sihke boazoealáhusas ja hálddahusas leai buoret hárjáneapmi ja máhttu hálddašit guohtunroasu hástalusaid dán jagi go jagi 2020. Buohkat ledje bures ráhkkanan dustet guohtunroasu.
Bargojoavku ii ávžžut stuorit rievdademiid, muhto evttoha smávit rievdademiid mat álkidahttet ja beavttálmahttet gearggusvuođa vuogádaga. Dan lassin evttohuvvojit doaibmabijut, vai roassogearggusvuohta ja roassohálddašeapmi čađahuvvo seamma vuogi mielde iešguđet boazodoalloguovlluin.
- Bargojoavkku raporta. En styrket beredskap i reindriften (pdf)
Ovdal juovlamánu 1.b.2022 almmuhuvvojit dieđut mat biddjojuvvojit dán raportta mielddusin, ja dat čájehit movt guohtunroassu váikkuha boazoealáhusa buvttadeapmái ja gánnáhahttivuhtii, ja movt álggahuvvon doaibmabijut leat váikkuhan ealáhussii.
