Buohcceviesuide stuorát rámmat

Dasa lassin evttoha ráđđehus lasihit 1,5 miljárdda ruvnnu loatnajuolludussan. Dat mearkkaša ahte oppalaš juolludusat buohcceviesuide lassánit 6,2 miljárdda ruvnnuin reviderejuvvon nationálabušeahtas.

Buohcceviesuid 2,5 miljárdda ruvdnosaš bistevaš bušeahttalassáneapmi dieđihuvvui guovvamánus juo. Dat mearkkaša ahte lassejuolludusat mat addojuvvojedje jagi 2022 ođđasalderemis jotkojuvvojit. Dasa lassin ožžot buohcceviesut sullii 2,2 miljárdda ruvnnu buhtadussan jagi 2023 hadde- ja bálkágoargŋuma geažil.

Vuoruhuvvon surggiid čuovvuleapmi

Lassáneamit addet buohcceviesuide vejolašvuođa buorebut čuovvulit jagi 2023 vuoruhuvvon surggiid ja dagahit ahte buohcceviesut sáhttet čađahit dárbbašlaš investeremiid.

Evttohuvvo heivehit buohcceviesuid loatnarámma huksengolloindeavssa mielde maŋásguvlui váikkuhusain. Dat mearkkaša 5,4 miljárdda ruvnnu lassi loatnarámma, mas 1,5 miljárdda evttohuvvo lassi loatnarámman jagi 2023 várás. Dat attášii dássedet ja eambbo einnostahtti ruhtadeami ovddasguvlui.

Dohkálaš ja oadjebas dikšu

– Mii leat ovdal dieđihan ahte dat lassejuolludus maid buohcceviesut ožžo mannan jagi ođđasalderemis, šaddá bistevaš juolludussan. Jagi 2023 haddegoargŋun lea leamaš stuorát go dat mii lei vuođđun dan bušehttii maid Stuorradiggi mearridii, nu ahte dát lassáneapmi dárbbašuvvo amas fertet geahpedit buhcciiddivššu ja dárbbašlaš investeremiid, dadjá dearvvašvuođa- ja fuolahusministtar Ingvild Kjerkol.

Ruđat addet buohcceviesuide buoret vejolašvuođa čuovvulit jagi 2023 stivrendokumeanttaid, mas vuoruhuvvon doaibmabijut leat psyhkalaš dearvvašvuođasuddjen ja vejolašvuohta olahit dearvvašvuođabálvalusaid johtilit. Nu mo dieđihuvvon, de gusket ođasmahttojuvvon meroštusat maiddái investerenpoasttaide.

– Erenoamáš buhtadus lea teknihkalaš rievdadus amas dárbbašit gáržžidit dan bušeahta maid Stuorradiggi mearridii juovlamánus 2022 ja daid vuoruhemiid mat ledje vuođđun mearrádussii, dadjá dearvvašvuođa- ja fuolahusministtar.