Buohkat fertejit válddihit koronaiskosa maŋŋil go Norgii leat boahtán
Ođas | Almmustahtton: 13.12.2021 | Dearvvašvuođa- ja fuolahusdepartemeanta
Ráđđehus lea dál čavgen koronaiskannjuolggadusaid, dan geažil go háliidat eastadit ja hehttet ođđa omikronvirusa leavvama. Bearjadaga juovlamánu 3.beaivvi gaskaija rájes galget buohkat geat bohtet Norgii válddihit koronaiskosa beroškeahttá boahkuhanstáhtusis.
-Dilli lea dál hui duođalaš Norggas. Danne lea dárbu čavget njoammuneastadandoaimmaid hehtten dihte omikron-virusa leavvama. Dan dahkat doalahan dihte geahču ja go dárbbašat áiggi čohkket eanet dieđuid ođđa virusa birra, ja amas dearvvašvuođabálvalusa bargonoađđi ii šatta menddo lossadin, dadjá dearvvašvuođa- ja fuolahusministtar Ingvild Kjerkol.
Ráđđehusa mihttomearri lea boahkuhit boarrásiid ja rašes joavkkuid ovdal go omikron-virus leavvá viidáset ođđa guovlluide Norggas. Dearvvašvuođadirektoráhta ja Álbmotdearvvašvuođainstituhta ávžžuhusaid vuođul rievdadat covid-19-láhkaásahusa nu ahte buohkat geat bohtet Norgii leat geatnegahttojuvvon iskkahit iežaset. Koronaiskkus čađahuvvo iskanstašuvnnas rájá alde, dahje eará sajis maid eiseválddit leat mearridan. Jos rájás ii leat iskanstašuvdna, de galgá koronaiskkus váldojuvvot 24 diimmu siste maŋŋil go Norgii lea boahtán.
Mátkkošteaddjit válljejit ieža válddihit go antigen iskosa (johtilisiskosa) almmolaš iskanstašuvnnas dahje ahte sii ieža čađahit antigen iskosa. Jos iskkus lea positiivva, leš dal ieš čađahan dahje iskanstašuvnnas válddihan, de galgá vel PCR-iskkus čađahuvvot nu johtilit go vejolaš ja maŋimustá 24 diimmu maŋŋil. Gáibádus guoská maid sidjiide geat ollásit leat boahkuhuvvon dahje buohcan covid-19-dávdda. Mátkkošteaddjit geat leat deavdán 12 jagi galget geavahit njálbmesuoji buot almmolaš báikkiin jos ii leat vejolaš doallat gaskka earáide, dassá go sáhttet duođaštit negatiivva koronaiskosa.
Dan lassin galgá čađahuvvot riskavuđot koronaiskkus buot mátkkošteddjiin (earret sii geat das sáhttet spiehkastit erenoamáš sivaid geažil).
Rádjabargit geat rasttildit rájá bargui, girdibargit ja ámmátvuoddjit sáhttet ain spiehkastit iskangáibádusas go bohtet Norgii.
Dál váldojuvvo fas atnui gáibádus čájehit negatiivva koronaiskosa go mátkkoštat Svalbárdii. Jos ollugat Svalbárddas buohccájit oktanaga koronanjoammudávddas, de dat boahtá sakka váikkuhit kritihkalaš servodatdoaimmaide danne go Svalbárddas ii leat nu buorre dearvvašvuođagearggusvuohta ja buohccit šaddet sirdojuvvot nannámii, mii fas sáhttá dagahit stuora váttisvuođaid ambulánsagirdigearggusvuhtii. Svalbárdda álbmot galgá vuoruhuvvot go fállat lassiboahkuid koronadávdda vuostá. Láhkaásahus boahtá fápmui juovlamánu 2.beaivvi dii. 24:00. Mátkkoštanráddjehusat galget ođđasit árvvoštallojuvvot guovtti vahku geahčen.