Elrávdnjedoarjja guhkiduvvo

– Mii háliidit ain bargat dan ovdii ahte olbmuin galgá leat oadjebas birgenláhki, beroškeahttá gos riikkas sii ásset. Danne áigut mii guhkidit dán gaskaboddosaš elrávdnjedoarjaga orrunviesuide, ássanservviide ja báikkálaš liggenrusttegiidda 2025:s, dadjá energiijaministtar Terje Aasland.

Ráđđehus árvala ahte elrávdnjedoarjjaortnega sturrodat muddejuvvo 73 evrres 75 evrii kilowattdiimmus doarjjamávssu gustovaš ceahki rájes. Stáhta máksá 90 proseantta elfápmohattis mii lea dan ceahki bajábealde, gitta 5 000 kilowattdiimmu rádjái mánus guđege mihttáris. Elrávdnjedoarjja rehkenastojuvvo spot-hatti mielde diimmus diibmui dan haddeguovllus gosa doarjjavuostáiváldi gullá.

Elrávdnjedoarjja unnida ássanviesuid ja ássanservviid mánnosaš elrávdnjegoluid dalle go elrávdnjehaddi guđege diimmus lea badjelis gustovaš ceahki. Dát lea ulbmillaš ortnet man mielde doarjja rehkenastojuvvo ássanviesu duohta elrávdnjegeavaheami vuođul.

 

Vurdojuvvojit vuolit elrávdnjehattit 2025:s

2022:s máksojuvvui 26,4 miljárdda ruvnno elrávdnjedoarjjan ássanviesuide, ja 2023:s máksojuvvui birrasiid 16,4 miljárdda ruvnno. Sivvan dasa go submi njiejai nu sakka, lea ahte elrávdnjehattit ledje njiedjan. 2025:s vurdojuvvojit vuolit hattit go maŋemus jagiid.

– 2024:s lea gártan eambbo čáhci magasiinnaide, ja dat lea sullii dábálaš dásis dál. Borgemánus arvvii hui olu, erenoamážit Vestlánddas, ja dat lea dagahan ahte magasiinnat leat dievvan. Liikká leat mii ain dan dilis ahte energiijamárkanat min birra leat eahpesihkkareappot go ovdal. Danne lea ráđđehus máŋgga vuorus guhkidan ja buoridan elrávdnjedoarjjaortnega. Olbmot galget sáhttit luohttit ahte stáhta váldá ovddasvástádusa, lohká Aasland.

 

Unnida linjáláiggu erohusaid

Ráđđehus árvala juolludit 18 miljovnna ruvnno unnidit kundariid

linjáláiggu erohusa fápmodistribuerenfierpmádagas 2025:s. Ortnega ulbmilin lea njuolga geahpidit daid geavaheddjiid linjáláiggu geat gullet fápmodistribuerenfierpmádagaide gos lea divraseamos linjáláigu. Linjáláigu lea dat maid geavaheaddji máksá dan ovddas go elrávdnji fievrreduvvo su ássanvissui.