Vuosttaš čoahkkin Eanandoallo- ja boazodoallovuđot ealáhusaid ovddideami ja árvoháhkama ovdánahttinprográmma strategalaš ráđis

Dát strategalaš ráđđi galgá nannet Ealáhusaid ovdánahttinprográmma sajáiduvvama politihkalaš dásis  sihke našuvnnalaččat ja regiovnnalaččat. Resurssaid ávkkástallan addá ealáhusaide ain buoret birgenvuođu ja eanet dienasvejolašvuođaid.

– Váikkuhangaskaomiid geavaheapmi lea jorggihan regiovnnalaš ovdáneami guvlui, mas ulbmilin lea nanu biebmo- ja mátkeealáhusregiovnnaid nannen. Dán ráđi bokte dáhttut mii loktet dán politihkkasuorggi, ja bures sajáiduhttit vuoruhemiid ja aktivitehtaid iežaset organisašuvnnaide ja regiovnnaide, lohká eanandoallo- ja biebmoministtar Geir Pollestad.

Ovdal dán ođđa strategalaš ráđi vuosttaš čoahkkima leat ovddiduvvon soames čuoggát dáid guoskevaš ealáhusaid joatkevaš ovddidanbargui.

Vuosttaš lea ahte báikkálaš borramušaid ja juhkamušaid ođđa vuovdinmihttomearrin lea biddjon 25 miljárdda kruvdno jagi 2035 rádjái. Ođđa vuovdinmihttomearri lea jurddašuvvon movttiidahttit eanebuid buvttadit báikkálaš borramušaid ja lasihit buvttadanbirrasiid miehtá riikka, ja lágidit dili buolvamolsašuvvamiidda ealáhusain.

Ráđđehus áigu maiddái bargat ovddidit mátkkoštanealáhusaid Norggas. Sihke eanandoallu ja boazodoallu leat mielde ásaheame luomustallanbáikkiid mat fállet mátkkošteddjiide vásáhusaid. Nubbi ulbmil lea viidáseappot ovdánahttit vejolašvuođaid ja fálaldagaid borramušturismma oktavuođas.

Ráđđi galgá ovttastit, loktet ja čalmmustahttit nu olu ealáhusaid go vejolaš ja ovddidit daid buoremus lági mielde. Muhto ealáhusat fertejit ieža nai leat árjjalaččat ja laktit borramušfálaldagaid mátkkoštanealáhusdoaimmaide.

Čoahkkima ulbmilin lei vuođđudit ráđi ja olahit oktasaš ipmárdusa ráđi mandáhta ja rolla dáfus.