Gaskaboddasaš kollektiiva suodji Ukraina báhtareddjiide
Preassadieđáhus | Nr: 21 – 2022 | Almmustahtton: 15.03.2022 | Justiisa- ja gearggusvuođadepartemeanta
Ráđđehus lea odne bidjan fápmui ortnega, man mielde Ukrainas báhtui bággehallan olbmuide sáhttet addit kollektiiva suoji jahkái. Ortnegii gullet Ukraina stáhtaborgárat, geat leat orron Ukrainas dassáigo soahti buollái. Ohccit fertejit čájehit identitehtaset ja čearddalašvuođaset jáhkehahttin vuosttažettiin Ukraina pássain dahje ID-koarttain.
Gaskaboddasaš suodjalanortnegii gullet Ukraina stáhtaborgárat, geat leat báhtaran Ukrainas guovvamánu 24. b. maŋŋá dán jagi. Ortnegii gullet maid goalmmát riikkaid borgárat ja mange stáhtii gulakeahtes olbmot, geain lea leamaš riikkaidgaskasaš dahje nationála suodjaleapmi Ukrainas, ja goalmmát riikkaid borgárat, geat leat lagaš bearašlahtut namuhuvvon joavkkuid olbmuide. Lohpi oažžut gaskaboddasaš kollektiiva suodjaleami gusto dan rájes, go ODI mearrida konkrehta ášši.
– 15 beaivvi leat vássán Ukraina soađi álgimis. Miljovnnat ukrainalaččat leat dál báhtaran min lagaš guovlluide, ja Norga bargá oasis ja váldá vuostá báhtareddjiid liekkusvuođain ja fuolahemiin. Dát veadjá leat dušše roasu álgu, eatge dieđe man viiddisin gártá. Go addit gaskaboddasaš kollektiiva suoji, sáhttit veahkehit Ukrainalaš báhtareddjiid, geat bohtet Norgii, ásaiduvvat johtilit, dadjá justiisa- ja gearggusvuođaministtar Emilie Enger Mehl.
Gaskaboddasaš ortnet ásahuvvo Ukraina dili geažil. Jos dilli rievdá mealgadii buoret guvlui, nu ahte oppalaš suodjalandárbu nohká, de ortnet fámuhuhtto.
Gaskaboddasaš kollektiiva suodjalanortnet mearkkaša, ahte dorvobáikeohcciide addojuvvo dorvobáiki joavkogullevašvuođa vuođul, iige oktagaslaš árvvoštallama vuođul. Lobiid mieđihit jahkái, ja daid vuođul besset bargat ja oažžut lagamus bearašlahtuid Norgii. Lohpi ii atte vuoigatvuođa ássat bistevaččat, muhto dan sáhttá ođadit jos Ukraina dilli bistá. Olbmot, geat eai gula ortnegii, sáhttet ohcat dorvobáikki dábálaš, oktagaslaš árvvoštallanvugiin. Ortnet, mii dál ollašuhtto, sulastahttá gaskaboddasaš suodjalanortnega, maid EU lea mearridan iežas miellahttoriikkaide.