Gulaskuddan boazodoallolága rievdadusevttohusaid ja eanajuohkinlága gullevaš rievdadusaid birra
Ođas | Almmustahtton: 02.07.2024 | Eanadoallo- ja biebmodepartemeanta
Ráđđehus lea odne sádden geassemánu 15. beaivvi lága 2007 nr. 40 boazodoalu birra (boazodoallolága) ja guoskevaš rievdadusaid birra geassemánu 21. beaivvi lágas 2016 nr. 100 ee. fástaopmodagaid opmodat- ja riektediliid rievdadeami lága (eanajuohkinláhka) rievdadusevttohusaid gulaskuddamii.
Gulaskuddanevttohusa vuođđun leat golbma vuoruhuvvon váldofátta: boazodoalu siskkáldas organiseren, eanajuohkinrievtti geavaheapmi boazodoalu siskkáldas dilálašvuođain ja buhtadusmearrádusat. Evttohusaid vuolggasadji lea otná láhkastruktuvra ja boazodoallolága dálá kapihtaljuohku. Eanadoallo- ja biebmodepartemeanta lea hábmen evttohusa.
– Mus lea jáhkku ahte evttohuvvon rievdadusat nannejit siskkáldas iešmearrideami čađaheami boazodoalus. Mu mielas livččii dál áigi ahte boazodoallu oažžu eanajuohkinlága váikkuhangaskaomiid geavahussii nu go fásta opmodagaid eará vuoigatvuođalaččatge, lohká eanadoallo- ja biebmoministtar Geir Pollestad (Gb).
Ráđđehusa viiddis fátmmasteami mearrádusa mielde lea Eanadoallo- ja biebmodepartemeanta viežžan cealkámušaid iešguđetge beliin árrat proseassas. Gulaskuddančoahkkimiin lea leamaš dehálaš čielggadit movt otná láhka doaibmá. Áigodagas borgemánus 2023 miessemánnui 2024 leat maiddái dollojuvvon oktiibuot 14 ráđđádallančoahkkima Sámedikkiin ja NBR:in. Ráđđehus lea soahpan sihke Sámedikkiin ja Norga Boazosápmelaččaid Riikkaservviin (NBR). Ráđđehus lea leamaš ovttamielalaš Sámedikkiin ja Norgga boazosápmelaččaid riikkaservviin buot evttohusain mat sáddejuvvojit gulaskuddamii.
– Lea buorre ahte stáhta lea olahan ovttaoaivilvuođa sihke Sámedikkiin ja NBR:in boazodoallolága rievdadanproseassas. Ovttamielalašvuohta boazodoalu ealáhuslága rievdadusaid birra lea buorre ealáhussii, eiseválddiide, ja earenoamážit boazodoalu ja ráđđehusa oktavuhtii. Munnje lea leamaš dehálaš vuoruhit láhkarievdadusaid surggiin main otná láhka ii doaimma ja seammás joatkit njuolggadusaid mat doibmet, dadjá Geir Pollestad (Sp).
Gulaskuddannotáhta galgá leat gulaskuddamis golbma mánu. Áigemearri buktit gulaskuddancealkámušaid lea golggotmánu 1. beaivvi 2024.