Johtolat buorrána albmáláhkái – miehtá riikka

- Boahtte logi jagi áigut mii geavahit oktiibuot 321,9 miljárda ruvnno stáhtabušeahtas hukset, jođihit ja divodit geainnuid, ruovdemáđijaid ja skiipajohtolagaid mearragáttiin. Dat lea 100 miljárda ruvnno dahje 45 proseantta eanet go ovddit Našuvnnalaš fievrredanplánas.

- Dát lea hui stuora doaibma ásahan dihtii eanet oadjebas ja ollu buoret fievrredan- ja sáhtostansystema, mii maiddái váldá buorebut vuhtii birrasa. Mii galget hukset ja čatnat riikka oktii. Olbmot ja ealáhusat galget johtileappot ja álkibut beassat johtit. Ruđat galget geavahuvvot dan láhkái ahte ovddidit buriid báikkálaš servodagaid, seammás go maid ovddidit ealáhusaid ja árvoháhkama buot guovlluin riikkas.  Ráđđehus nanne kollektiivajohtolaga dakkár guovlluin gos orrot ollu olbmot ja buorida biilageainnuid dakkár guovlluin gos eai sáhte toga ja oktasaš sáhtuid geavahit.

- Mii lasihit investeremiid geainnuide ja ruovdemáđiide ja bearráigeahččat ahte prošeavttat mat juo leat álggahuvvon, čađahuvvojit albmáláhkái. Mii lasihit doaibmadoarjagiid ja divodanruhtadeami sihke geainnuide ja ruovdemáđiide.

-  Mii galgat bargat lagabui 40 stuora geaidnoprošeavttaiguin, main juohke prošeakta máksá bures badjel 200 milliuvnna ruvnno. Earet eará galgá E6 davvin lulás buoriduvvot sakka, E16 Oslo – Bergen  ja Kyststamvegen E39 galget buoriduvvot. Mii evttohit 10 miljárda ruvnno uđassihkkarastin doaimmaide. Galgá ráhkaduvvot  230 kilomettara njealjetfealttat geaidnu ja 350 kilomettara riikkageaidnu galgá divoduvvot dakkár standárdii mas lea fiskes gaskasárggis. Mii oažžut 500 kilomettara vázzin- ja sykkelastinluotta, 750 kilomettara ođđa gaskaáiddi biilageainnuide ja galget čađahuvvot ollu eará doaimmat mat dahket johtolaga eanet sihkkareabbon.

- Galget ráhkaduvvot ođđa duppalluottat váldo Østlandda guvlui ja ollu dehálaš geainnut Bergenis ja Troandimis galget ráhkaduvvot ja buoriduvvot.  Ollu eanet togat galget sáhttit johtit oktanis ruovdemáđijaid mielde, galgá šaddat oanehit mátkkoštanáigi ja eanet luohtehahtti togadoaibma. Go ráhkadit ja buoridit ruovdemáđijaid dakkár báikkiin gos togaluottat mannet ruossut, de oanidit mátkkoštanáiggi ja duppalastit vejolašvuođa fievrredit gálvvuid togamáđiija mielde.

- Mii guoská dan oassái maid stáhta galgá máksit riikkageainnuid feargabálvalusaid ovddas, de árvalit dan doalahit seamma dásis go 2009 bušeahtas. Diet rámma dahká vejolažžan viiddidit feargabálvalusaid, sihke riikkageainnuid oktavuođas ja maiddái dain ođđa fylkkageainnuin.

- Regionála girdihámmanat ja regionála girdifálaldagat leat dehálaččat dan ektui mii guoská bargguid doalaheapmái ja ássamii miehtá riikka. Dálá girdihámmanstruktuvra galgá doalahuvvot, jus báikkálaččat ii leaš sávaldat heaittihit girdihámmána.

Dán cealká johtolatministtar Liv Signe Navarsete, go ráđđehus odne lea almmuhan stuoradiggedieđáhusa Našuvnnalaš fievrredanplána 2010-2019. Dieđáhusas muitalit roavvát makkár fievrredanpolitihkka ráđđehusas lea, ja dat lea veahkkeneavvu mainna sáhttá vuoruhit huksemiid, jođiheami ja divodemiid mat gusket stáhta fievrredanortnegii.