Ráhkis buohkat – Lihkku sámi álbmotbeivviin!
Sártnit/sáhkavuorut | Almmustahtton: 06.02.2023 | Eanadoallo- ja biebmodepartemeanta
Lágideaddji: Eanadoallo- ja biebmoministtar Sandra Borch
Odne mii ávvudit sámi historjjá, kultuvrra ja identitehta miehtá riikka. Mii maid čalmmustahttit dan ahte dál lea 30 jagi áigi go vuohččan ávvuduvvui sámi álbmotbeaivi. Beaivi lea ain liikká dehálaš ja dárbbašlaš go dalle lei.
Boazodoalloministtarbarggu bokte beasan mun duos dás ain deaivvadit boazodoalloealáhusa áŋgiris ja čeahpes ovddasteddjiiguin. Okta deaivvadeapmi mii bázii millii lei go fitnen Guovdageainnus ja bessen dearvvahit boazodoallonuoraid. Mii digaštalaimet earret eará boazodoalu rekrutterema, hástalusaid ja vejolašvuođaid birra, ja nuorain ledje olu buorit cealkámušat ja oaivilat maid lean vurken muitui. Ii leat ii eahpádus ge ahte ealáhus birge bures, ja dan lea hui illudahtti oaidnit.
Maŋemus jagi leat máŋga gáibideaddji ášši čuohcan ealáhussii, nu go sisabahkkemat, boraspiret ja erenoamážit guohtunroassu. Dál maŋŋel sáhttit nannet ahte mii birgiimet bures guohtunroasu čađa. Háliidan rámpot din buohkaid, boazodolliid, dan barggu ovddas maid dagaidet. Dii barggaidet oba olu áimmahuššan dihte iežadet elliid čálggu ja mun lean hirpmahuvvan go lean oaidnán man sávrrit dii lehpet. Lei maid buorre oaidnit ahte ealáhusa ja hálddašeami ovttasbargu doaibmá bures.
Dálkkádatrievdamiidda heivehit, boahtá leat okta dain stuorimus bargguin mat leat vuordimis eiseválddiide ja ealáhussii boahttevaš jagiid. Mun jáhkán ahte mii ovttas gávdnat dárbbašlaš heivehemiid ja buriid čovdosiid vai boazodoallu boahtteáiggis maid boahtá leat luondduvuđot ealáhus.
Vaikko boazodoalus leat ge olu hástalusat, de lea maid dehálaš čalmmustahttit maŋemus jagiid positiiva ovdáneami maid leat oaidnán árvoráiddus, duoddara rájes beavddi rádjái. Haddeovdáneapmi maid boazodoallit leat vásihan, lea leamašan mearkkašahtti, ja diekkár ovdáneami gal ille gávdná eará biergobuvttadeddjiin. Go hotealla- ja restoráŋŋamárkan lei gitta pandemiija čađa ja rájit ledje giddejuvvon, de stuorui geavaheaddjemárkan. Dat dagai buori bohccobiergojohtui. Dál lea mátkeealáhusas fas lassánan doaibma. Dás duohko boahtá leat dehálaš ahte bohccobiergu ain eanet boađášii dien márkanii. Mu mielas lea liikká lunddolaš guossohit bohccobierggu tallearkkaid nalde, go dat ahte geavaheaddjit gávdnet bohccobierggu rámburhilduin.
Go olgoriikkalaš turisttain jearrá maid sii háliidit vásihit Norggas, de vástidit dávjá guovssahasa ja boazodoalu. Lea dehálaš ahte buohkat ealáhusas barget dan ovdii ahte hoteallat ja restoráŋŋat lagasbirrasis fállet bohccobierggu. Muital bierggu duogáža birra. Dainna lágiin besset guossit buori biepmu návddašettiin maid oahppat báikkálaš biepmu ja historjjá birra, ja erenoamážit boazodoalu birra mii lea áibbas erenoamáš ealáhus.
Mu mielas gal ii bálljo gávdno buoret beaggindoaibmabidju go njálgga biebmu, hersko, mii lea ráhkaduvvon Norgga vuođđoávdnasiiguin mas lea bohccobiergu guovddážis - ja mas oasti beassá gullat duoddara searaid birra maid seammás.
Bohccobiergu lea erenoamáš dilálašvuođaid váste, ja olles jagis ii gávdno buoret beaivi go odne borrat bohccobierggu.
Lahkoe biejjine – Vuorbbe biejvijn – Lihkku beivviin – Gratulerer med dagen!
