Boazodoalu roassogearggusvuođafondii lasihuvvo 13,2 miljovnna kruvnnu
Ođas | Almmustahtton: 18.03.2022 | Maŋimuš ođasmahttojuvvon: 22.03.2022 | Eanadoallo- ja biebmodepartemeanta
Eanadoallo- ja biebmodepartemeanta (EABD) ja Norgga Boazosápmelaččaid Riikasearvi (NBR) leat odne soahpan lasihit 13,2 miljovnna kruvnnu roassogearggusvuođafondii.
– Dat lea hui positiivvalaš dahku. Lassi ruhtademiin sáhttit ain veahkehit boazoeaiggádiid vai nagodit hálddašit duođalaš guohtunroasu, dadjá eanadoallo- ja biebmoministtar Sandra Borch.
Dán dálvvi guohtunroassu lea váikkuhan negatiivvalaččat boazodollui. Bohccuide lea šaddan dađi váddáset gávdnat biebmu, ja guohtunroassu lea dál eanaš boazodoalloguovlluin Finnmárkkus, Romssas ja Nordlánddas. Daid guovlluin lea dárbbašlaš biebmat sullii 160.000 bohcco liigefuođđariiguin.
Roassogearggusvuođafoanda ruhtaduvvo boazodoallošiehtadusa bokte. NBR ja EABD sohpe ođđajagimánus doarjjaortnega man vuođul gearggusvuođafoanda buoremus lági mielde galgá geavahuvvot hálddašan dihte guohtunroasu.
Ortnega vuođul sáhttá stáhtahálddašeaddji juolludit 4,50 kruvnnu juohke bohcco nammii jándoris. Orohagat galget ruđaid hálddašit sihkkarastin dihte elliidčálggu ja boahttevaš buvttadeami. Ortnegii leat mearriduvvon sierra njuolggadusat.
– Ovttasbargu NBR:n lea konstruktiiva ja buorre, dadjá Borch.
–Eanadoallodirektoráhta ja stáhtahálddašeaddjit leat bidjan ollu návccaid doaimmahit ohcamušaid vai doarjja máksojuvvo orohagaide nu johtilit go vejolaš. Seammás leat boazoeaiggádat áŋgirit ja árjjálaččat fuolahan elliidčálggu ja dan ahte bohccuin galgá leat nu buorre dilli go vejolaš. Mun áiggun čuovvut guohtunroasu hui dárkilit, ja árvvoštallat lasihit eanet doaibmabijuid jos lea dárbu, dadjá eanadoallo- ja biebmoministtar.
Šiehtadusbealit fuomášahttet ahte njuolggadusaid mielde sáhttá doarjja geavahuvvot iešguđet doaibmabijuide, ja deattuhit erenoamážit ahte doarjja sáhttá geavahuvvot oastit ja fievrridit fuođđariid ealuid lusa ja geasehit bohccuid dálveorohagas giđđa- ja geasseorohahkii.
