Kultur- ja dásseárvobušeahtta stuorru sakka

– Mii dahkat aktiivvalaččat juoidá láhčit dili nu ahte buohkat sáhttet searvat kultureallimii, valáštallamii ja eaktodáhtolaš organisašuvnnaide, beroškeahttá duogážis ja gos ássá. Mii háliidit ahte buohkain galgá leat friddjavuohta eallit buriid ja dorvvolaš eallimiid nugo iežat háliidit. Dat buorida ja riggudahttá min servodaga go nu oallugat go vejolaš oassálastet min searvevuođaide, dadjá kultur- ja dásseárvoministtar Lubna Jaffery.

Evttohuvvon 2024 kulturbušeahtta lea stuorámus mii goassege lea leamaš.

Dáidaga, kultuvrra ja filmmaid váldovuoruheamit

• Ráđđehus áigu vuoruhit báikkálaš ja regionála kultuvrra, ja evttoha eanet doaibmadoarjaga olu museaide, kulturvisttiide ja kulturásahusaide miehtá riikka. Dasa lassin evttoha ráđđehus juohkit 50 miljovnna ruvnno ovttahávedoarjjan báikkálaš kulturdoaimmaide ja prošeavttaide.
• Ráđđehus háliida nannet dáiddárekonomiija. Ráđđehus árvala bajidit Stáhta dáiddastipeandda juolludemiid 20 miljovnnain ruvnnuin earret eará ásahan dihte 44 ođđa stipeandavuođdusa, ja 15 miljovnna ruvnno mii várrejuvvo buhtadusaide ja bálkkáide dáiddáriidda.
• Ráđđehus áigu nannet filbma- ja dihtorspealloáŋgiruššama 40 miljovnnain ruvnnuin, ja bajidit insentiivaortnega rámma 30 miljovnnain ruvnnuin.
• Ráđđehus áigu ásahit doarjjaortnega lávdedáiddajoavkkuide mat leat doaibman guhkes áiggi ja evttoha várret 26 miljovnna ruvnno ortnegii.
• Ráđđehus áigu nannet giella, lohkanmiela ja girjjálašvuođagaskkusteami áŋgiruššama 11 miljovnnain ruvnnuin.

Eaktodáhtolašvuođa ja valáštallama váldovuoruheamit

• Ráđđehus áigu láhčit ollislaš lassiárvodivatbuhtadeami eaktodáhtolašvuhtii ja valáštallamii, ja evttoha bajidit juolludemiid lassiárvodivatortnegiidda 500 miljovnnain ruvnnuin.
• Valáštallan- ja kulturfálaldat galgá leat lihka olámuttus buot mánáide beroškeahttá duogážis ja ássanbáikkis. Dán čavčča álggaha ráđđehus barggu ráhkadit oassálastima doaibmaplána,  ja árvala 10 miljovnna ruvnno čuovvoleapmái 2024:s.  
• Ráđđehus joatká vuoruhit eaktodáhtolašguovddážiid ja evttoha bajidit doarjagiid 38 miljovnna ruvnnuin.
• Ráđđehus árvala juolludit 5,5 miljovnna ruvnno goanstarássešiljuid kártemii Norggas, ja guhkit áiggi dárbbu lonuhit gummigranuláhta ceavzilet molssaeavttuin.

Dásseárvvu ja máŋggabealatvuođa váldovuoruheamit

• Ráđđehus áigu loktet barggu ovddidit dásseárvvu ja vuosttidilit vealaheami, ja árvala bajidit suorggi juolludemiid 18 miljovnnain ruvnnuin.
• Ráđđehus áigu nannet sámi kultuvrra ja nationála minoritehtaid vuoruheami ja evttoha earret eará eanet doarjaga Beaivvážii, Dáiddadállui ja Kväänteatterii (Kvenateáhterii).