Kulturlokten vai eanet mánát ja nuorat besset searvat

Preassadieđáhus | Nr: 51/24 | Almmustahtton: 07.10.2024 | Maŋimuš ođasmahttojuvvon: 14.10.2024 | Kultur- ja dásseárvodepartemeanta

Ráđđehus áigu várret 55 miljovnna ruvnno buoridit mánáid ja nuoraid searvama kultur- ja astoáiggedoaimmaide. Ruđat galget mannat astoáiggejoavkkuide, korpsaide, lohkanhállui, dihtorspealuide, ja eanet teáhtera lágideapmái eanebuidda.

– Ráđđehus vuoruha barggu eastadit olggobealvuođa, fátmmastit eanebuid ja hukset buriid fálaldagaid olles riikkas. Kulturdoaimmain lea stuorra árvu iešalddis, muhto dasa lassin dain lea maid buorre eastadeaddji beaktu. Danne mii dál áŋgiruššat olu iešguđetlágan doaimmaiguin, dadjá kultur- ja dásseárvoministtar Lubna Jaffery. Mihttomearri lea ahte eanet mánát ja nuorat ožžot vejolašvuođa searvat valáštallamii, kultuvrii ja astoáiggedoaimmaide beroškeahttá geat sii leat, gos sii orrot, dahje váhnemiid ruhtaburssas.

– Dađi bahábut lea nu ahte mánát geat bohte bearrašiin main bissovaččat leat vuollegis sisaboađut, oassálastet unnit go earát kultureallimis. Mii háliidit fátmmastit eanebuid, ja dát áŋgiruššan lea dehálaš oassin buohkaid fátmmasteamis, cealká Jaffery.

Ruhta várrejuvvo olu iešguđetlágan ulbmiliidda. Earret eará oažžu Norgga Musihkkakorpsa Lihttu ruđaid iežaset doibmii doalahit eanet nuoraid korpsas. Ráđđehus háliida maiddái ahte eanet skuvlaoahppit galget beassat vásihit alla dását teáhtera nuvttá iežaset báikkálaš kulturviesus, ja várre guokte miljovnna ruvnno Riikkateáhtera bileahttafondii. Vihtta miljovnna ruvnno várrejuvvo dihtorspealuid oastimii mánáid ja nuoraid dihtorspeallokultuvrra oadjebas ja searvadahtti deaivvadanbáikkiide.

– Ráđđehus vuoruha dihtorspealuid danne go mii diehtit ahte doaimmat leat deaŧalaččat ollu mánáide ja nuoraide, ja mii háliidit láhčit diliid nu ahte doaimmat sáhttet čađahuvvot searvevuođain ja buriin, almmolaš deaivvadanbáikkiin, lohká Jaffery.

55 miljovnna mánáid ja nuoraid searvamii juogaduvvo ná

10 miljovnna ruvnno viidásetfievrriduvvo doaibmaplánii "Alle inkludert!»
10 miljovnna ruvnno Nuorat ja Astoáigi Fondii (Ungdom og Fritids Fond)
6 miljovnna ruvnno Norgga Musihkkakorpsa Lihttui, Nuoraidloktemii
2 miljovnna ruvnno Riikkateáhtera bileahttafondii - friddjabileahttaortnet skuvlaohppiide
2 miljovnna ruvnno Tigerstadsteáhterii, doibmii
5 miljovnna ruvnno Filbmafondii, dihtorspealuid oastimii
20 miljovnna lohkanhállui (sierra preassadieđáhus)