Kultuvra loktejuvvo miehtá riikka 2025

• Kultur- ja dásseárvoministtar ovdanbuktime bušeahttaárvalusa golggotmánu 7. beaivvi 2024 (bokmål)

Vuoruhit báikkálaš ja regiovnnlaš kultuvrra

• Ráđđehus árvala juolludit doarjaga 16 ođđa prošektii, mat leat našuvnnalaš kulturviesuid ortnega vuolde, mas oktiibuot juolluduvvo stáhtalaš mielváikkuhussan badjel 621 miljovnna ruvnno. Huksenprošeavttat leat juohke sajis riikkas.
• Ráđđehus árvala ásahit ođđa ortnega regiovnnalaš kulturfoanddaide, masa juolluduvvo 75 miljovnna ruvdno. Dat galgá fylkkasuohkaniidda addit eambbo návccaid doarjut báikkálaš ja regiovnalaš kultureallima. Dat lea ođđa vuoruheapmi mii nanne kulturfálaldagaid miehtá riikka.
• Ráđđehus áigu áimmahuššat kulturásahusaid, ja árvala juolludit eambbo ruđa doaimmahit eambbo musihkka- ja lávdeásahusaid ja museaid. Oktiibuot juolluda ráđđehus 82,3 miljovnna ruvnno iešguđetlágan kulturásahusaide miehtá riikka, vai dat nagodit ovddidit buriid fálaldagaid iežaset oasseváldiide.
• Ráđđehus áigu nannet kulturárbbi digitaliserenbarggu, ja árvala lasihit juolludemiid 20 miljovnna ruvnnuin Nationálagirjerádjui Muoffies ja Norgga dearvvašvuođaarkiivii Tynsetas.
• Ráđđehus áigu vára váldit dárogielas ja sámegielas ja kultuvrras, ja árvala juolludit 40 miljovnna ruvnno giellamodeallaide, maiguin ovddida goanstajierpmi.
• Sámi musea RiddoDuottarMuseat Kárášjogas hálddaša stuora hivvodaga sámi dáiddačoakkáldaga ja sis lea dárbu ođđa lanjaide gos sáhttet čájehit dan gehččiide. Ráđđehus áigu juolludit 10 miljovnna ruvnno ođđa museavistti ovdaprošektii.

Lasihit mánáid ja nuoraid searvama

• Ráđđehus áigu juolludit 55 miljovnna ruvnno kulturloktemii, mas mihttu lea oažžut mánáid ja nuoraid searvat eambbo kultur- ja astoáigefálaldagaide. Ruđat galget mannat astoáigeklubbaide, korpsaide, lohkanmoktii, dihtorspealuide ja teáhteriidda.
• Ráđđehus áigu láhčit dili nu ahte eaktodáhtolašvuohta ja falástallan galget oažžut ollislaš lassiárvodivatbuhtadusa, ja árvala lasihit juolludemiid lassiárvodivatortnegiidda 210 miljovnna ruvnnuin.
• Ráđđehus áigu nannet mánáid ja nuoraid lohkanmovtta, ja árvala juolludit 20 miljovnna ruvnno stádabušeahtas, mainna čuovvula ráđđehusa lohkanmoktastrategiija doaibmabijuid.
• Ráđđehus áigu nannet áŋgiruššama man ulbmil lea  eastadit ekstremismma,  ja árvala juolludit 15 miljovnna ruvnno čuovvolit Ekstremismakommišuvnna ávžžuhusaid.

- Dorvvohis áiggis dárbbašit mii investeret dáidagii ja kultuvrii, go dárbbut leat stuorrát. Leat gáibideaddji áiggit garra vuoruhemiiguin, ja mun lean ilus go ráđđehus lea válljen vuoruhit dáidaga ja kultuvrra, dadjá kultur- dásseárvoministar Lubna Jaffery.