Eanandoallo- ja biebmoministtar Pollestad celkkii dearvuođaid Norgga Boazosápmelaččaid Riikkasearvvi (NBR) 2024 riikkačoahkkimii
Ođas | Almmustahtton: 25.06.2024 | Eanadoallo- ja biebmodepartemeanta
Bearjadaga geassemánu 14. b. ja lávvordaga 15. b. doalai Norgga Boazosápmelaččaid Riikkasearvi (NBR) 2024 riikkačoahkkima Rosses. Riikkačoahkkin lea NBR alimus váldi, ja dáppe oassálastet buot NBR báikkálaš servviid sáttatolbmot.
Pollestad muitalii riikkačoahkkimii máŋgga ášši birra maiguin departemeanta bargá dál, earret eará 2024/2025 Boazodoallošiehtadusa ja boazodoallolága ollislaš ođasmahttinbarggu birra. Stáhtaráđđi deattuhii ahte Internationale Grüne Woche (IGW) ja Bocuse d'Or Europe oassálastin leat daid deháleamos dáhpáhusaid searvvis dán rádjai su stáhtaráđđeáigodagas. Sámi boazodoallu ja bohccobiergu lei guovddážis goappašat doaluin.
– Bohccobierggu válljen oktan váldoávnnasin Bocuse d'Or gilvvuid Eurohpá-finálii Troandimis bijai bohccobierggu dan dássái gosa dat gullá – namalassii buoremus ávdnasiid dássái. Válljejupmi čájeha ahte boazodoallu sáhttá buvttadit kvalitehtaid maid ođđaáigásaš njunušgoahkat gáibidit. Fas nagodedje goahkat, boazosámi nuorat, boazodoalu ovddasteaddjit ja fitnodagat ovttasráđiid loktet bohccobierggu ja boazodoalu, konstaterii duhtavaš Pollestad.
Stáhtaráđđi guoskkahii maid olu dain hástalusain mat boazodoalus leat. Fovse-ášši ja šihttojuvvon soabahančoavddus lei okta fáddá, dasa lassin ledje guohtonroasut dálkkádatrievdamiid geažil ja boraspireváttisvuođat fáddán. Boazovahágat boraspiriid geažil leat vuollegis buvttadeami ja hedjonan gánnáheami váldosivva olu orohagain.
– Mii eat sáhte dohkkehit dálá dili mas muhtin orohagat fertejit oažžut buhtaduvvot gitta beali miessešattus boraspirevahágiid geažil. Dat čuohcá ealáhusa buvttadeapmái ja gánnáheapmái, dat čuohcá psyhkalaččat bearrašiidda mat gillájit stuorra vahágiid, ja dasa lassin lea dat hástalussan elliidčálgui, dajai eanandoallo- ja biebmoministtar.
Riikkačoahkkimis lei eanandoallo- ja biebmoministtar maiddái fárus geigeme jagi 2024 nuorra boazodoalli-bálkkašumi Johan Máhtte Eirai Fávrrosordda orohagas Oarje-Finnmárkku boazoguohtunguovllus.
Norgga Boazosápmelaččaid Riikkasearvi (NBR)
Norgga Boazosápmelaččaid Riikkasearvi lea boazosápmelaččaid nationála ealáhus- ja beroštusorganisašuvdna, mii vuođđuduvvui 1947:s. NBR:s lea šiehtadallanvuoigatvuohta stáhtain jahkásaš boazodoallošiehtadusa hárrái. NBR ulbmil lea ovddidit boazosápmelaččaid beroštumiid ekonomalaččat, fágalaččat, sosiálalaččat ja kultuvrralaččat. NBR galgá ovddidit boazosápmelaččaid oktavuođa ja bargat dan ovdii ahte boazosápmelaččat stivrejit ealáhusa ovdáneami.
NBR:s leat 8 báikkálaš searvvi ja buohkat leat ovddastuvvon riikkastivrras. Báikkálaš searvvit leat Várjjat Boazosámesearvi, Buolbmát Johtti Sámiid Searvi, Kárášjoga johttisámi searvi, Guovdageainnu johttisápmelaččaid searvi, Tromssa Boazosápmelaččaid Fylkasearvi, Nordlaanten båatsoesaemieh, Gaske Dajven Båatsoe Tjieltie ja Åarjel-dajven Båatsoesaemieh.
Dasa lassin lea NBR:s nuoraidlávdegoddi mas buot báikkálaš searvvi boazodoallonuorat leat ovddastuvvon.