Lihkku sámi álbmotbeivviin!

Duo gieskat ledjen dain stuora borramuš- ja mátkeealáhusmeassuin «Internationale Grüne Woche» (IGW) Berlinas. IGW čohkke jahkásaččat badjel 1500 oasseváldi birrasiid 70 riikkas, ja dat lea Norgga borramuš-, juhkamuš- ja mátkeealáhusvásáhusaid fálliide hui deaŧalaš gávnnadansadji. Norgga searvamis deattuhuvvui dán jagi erenoamážit bohccobiergu ja sámi kultuvra, ja dat lei čielga oassi Norgga fálaldaga profiillas.

Guossit čájehedje stuora beroštumi, ja dáppe beasaimet mii duođai ovdanbuktit sámi kultuvrra, ealáhusa ja árvoháhkama. Lei stuora beroštupmi sihke borramuššii ja kultuvrii mii čájehuvvui, ja bohccobirgui gal liikojedje dat oallut guossit geat dán erenoamáš buktaga muosáhedje. Ii leat eahpádus das ahte boazodoalu vuđot turistaealáhusas leat buorit árvoháhkanvejolašvuođat, lassiealáhussan daidda geain lea dáhttu dasa bidjat návccaid.

Giitu buohkaide sámi sáttatgottis geat fuolahedje ahte dán jagi Norgga searvan IGW meassuide nu bures lihkostuvai. Juohkehaš barggai árjjalaččat ja berre leat rámis dainna mii olahuvvui – sii leat sihke boazodoalu ja sámi servodaga ovddastan bures.

Bohccobierggu márkandilálašvuohta lea ain ovdáneame buori guvlui. Máŋgga garra dálvvi guohtunroasuid maŋŋel máŋgga orohagas oaidnit mii dál ahte Norgga bealde lassána njuovvan ja bohccobierggu buvttadeapmi. Dat ii livčče leamaš vejolaš almmá dan barggu haga man juohke okta boazodoalli čađaha juohke áidna beaivvi. Kvalitehtabuktagat mat bohccos ráhkaduvvojit leat čielga boađusin dan barggus mii bargojuvvo, ja dán ávki oidno hattis maid boazodoalli olaha.

Márkanvuđot gálvoovdánahttima ja olles árvogollosa profešonaliserema bokte duoddara rájes gitta borranbeavddi rádjái lea bohccobiergu sajustuvvan njálgámus ja dearvvašlaččamus biergun mii gávdno. Dán leat dađistaga eanebut fuomášišgoahtán, ja dan ovdii fertet mii ain joatkit bargat.

Danne lea hui buorre ahte bohccobiergu galgá guossohuvvot Bocuse d´or Europe 2024 oktavuođas Troanddimis njukčamánus, mii lea eurohpáfinála máilmmi alimus goahkkagilvui mii dollojuvvo Lyonas 2025:s. Dán jagi gilvvus galget bohccočoarbbealit, váhkkádeahkit ja njuokčamat adnot ávnnasin dállearkaguossoheamis. Dat rahpá vejolašvuođa vel eanebuidda vásihit buriid borramušaid mat leat ráhkaduvvon bohccobierggus, ja dat lea mielde fuomášuhttime dan sajádaga maid bohccobiergu lea olahan min bajimus kvalitehtagálvvuid gaskkas. Seammás lea dákkár oassálastin mielde lasiheame ipmárdusa bohccobierggu ja boazodoalu birra.

Iežan stáhtaráđđedoaimmas lea munnje leamaš illun beassat oahpásnuvvat boazodoaluin, sihke ealáhussan, muhto maiddái deaŧalaš sámi kulturdoaibman ja árbevierrun. Mun lean beassan oaidnit movt boazosámi bearrašat barget iežaset kulturárbbi áimmahuššamiin, ja lean beassan vásihit makkár beroštupmi dál lea ovdánahttit guoddevaš boazodoalu. Dat addá munnje movtta iežan bargui boazodoalloministtarin, ii ge galgga leat eahpádus das ahte mun anán dán stuora ja allaárvosaš ovddasvástádussan.

Dáinna sávan mun buohkaide hávskes álbmotbeaivvi ávvudeami – ja sávvamis lea bohccobiergu otná herskobeavddis!

Lahkoe biejjine – Vuorbbe biejvijn – Lihkku beivviin – Gratulerer med dagen!