Lihku máilmmi álgoálbmotbeaivái!
Preassadieđáhus | Almmustahtton: 09.08.2022 | Gielda- ja guovlodepartemeanta
Odne čalmmustahttit ON riikkaidgaskasaš álgoálbmotbeaivvi. Dán jagi fáddán lea álgoálbmotnissoniid dehálaš rolla árbedieđu seailluheamis ja sirdimis.
– Mii sávvat sámiide ja eará máilmmi álgoálbmogiidda lihku beaivái, dadjá gielda- ja guovloministtar Sigbjørn Gjelsvik. Son deattuha ahte beaivvi ávvudeapmi dovddaha máilmmi álgoálbmogiid, sin kultuvrra ja vuoigatvuođaid árvvusatnima.
ON álgoálbmotbeaivvi ásahii ON váldočoahkkin jagi 1994. Odne lea aiddo 40 jagi dan rájes go ON máilmmi álgoálbmogiid bargojoavku doalai vuosttaš čoahkkima – borgemánu 9. b. 1982. Dán jagi galgá álgoálbmotbeaivi deattuhit álgoálbmotnissoniid rolla erenoamážit.
– Nissonat leat hui dehálaš árbevierroguoddit máilmmi ollu álgoálbmotservodagain. Seammás sii leat dávjá dakkár suojehis joavku mii gillá vealaheami sihke sohkabeali ja čearddalašvuođa geažil. Danne lean ilus go ON dál čalmmustahttá álgoálbmotnissoniid dili ja gudnejahttá sin dehálaš váikkuhusa kultuvrii, dadjá Gjelsvik