Mánáid ja nuoraid koronaboahkuheapmi

-Lea hárve ahte mánát buohccájit nu duođalaččat koronadávddain, ja mis eai leat vuos nu ollu dieđut guhkit áiggi lassiváikkuhusaid birra. Eanaš mánáide ii leat nu stuora ávki boahkus, ja Álbmotdearvvašvuođainstituhtta (ÁDI) ii rávve boahkuhit buot mánáid gaskal 5 ja 11 jagi. ÁDI addá váhnemiidda ja ovddasteddjiide fálaldaga boahkuhit mánáideaset, muhto dat guoská dušše muhtun mánnájoavkkuide, dadjá dearvvašvuođa- ja fuolahusministtar Ingvild Kjerkol. 

Fálaldat guoská erenoamážit mánáide geain leat bissovaš dávddat, bearrašiidda gos mánáin lea lagas oktavuohta olbmuiguin geat dárbbašit erenoamáš suddjema ja mánáide geain lea stuorit riska buohccát go orrut riikkas gos lea ollu njoammun dahje heajos dearvvašvuođabálvalusfálaldagat. Dat guoská maid mánáide geat juoga nu sivaid geažil ellet erenoamáš rašes dilis.

-Mii čuovvut Álbmotdearvvašvuođainstituhta rávvagiid, ja fállat nuvttá boahkuheami mánáide, jos váhnemat ja ovddasteaddjit dan háliidit, dadjá Kjerkol.

Nuorat gaskal 12 ja 15 jagi

ÁDI rávve fállat 12-15 jahkásaččaide nuppi boahkkodosa.  Muhto dat ii addo oktasaš ráva ahte váldit nuppi boahkkodosa dan sivas go okta dosa suddje bures ja guhkit áiggi, ja nubbi dosa sáhttá mielddisbuktit stuorit vára oažžut váibmodeahkkevuolšši. Mis eai leat vel dál doarvái dieđut buot liigeváikkuhusaid birra. Almmatge fállojuvvo boahkuheapmi sidjiide geat dan háliidit.

-Ráđđehus čuovvu Álbmotdearvvašvuođainstituhta rávvagiid mat gusket mánáid ja nuoraid boahkuheapmái. Dat lea eaktodáhtolaš fálaldat, ja váhnemat dat mearridit háliidit go sii boahkuhit mánáideaset. Mii doarjut ÁDI oaiviliid ahte suohkanat fertejit várrugasvuođain čađahit boahkuheami skuvllain, danne go dat sáhttá ipmirduvvot ahte boahkuhanráva boahtá eiseválddiin ja ahte boahkuheapmi ii leat eaktodáhtolaš fálaldat, dadjá Kjerkol.  

Álbmotdearvvašvuođainstituhta (ÁDI) árvvoštallan ja rávvagat

Mánáin ja nuorain lea uhcit várra buohccát duođalaččat koronadávddain. Mánát eai  sisačálihuvvo buohccevissui nu dávjá njoammuma geažil ja gaskamearálaččat leat mánát leamaš divššus ovtta jándora.  ÁDI jáhkká ahte boahkut eai suddje nu bures omikronvirusa vuostá go ovdalis virusvariánttaid vuostá, muhto boahkut suddjejit váralaš dávddaid vuostá. Mis ii leat doarvái máhttovuođđu vejolaš liigeváikkuhusaid birra mat gusket ahkejovkui 5-11 jagi, ja danne ferte boahkuheapmi čađahuvvot várrugasvuođain.  

Danne ii atte ÁDI oktasaš rávvaga ahte boahkuhit buot mánáid, muhto oaivvilda ahte sihke vuosttaš ja nuppi boahkkodosa sáhttá unnidit buohccánvára muhtun mánnájoavkkuin.