Nannejit diabetesdálkasiid háhkanvejolašvuođa ja unnidit álbmotoaju goluid

Ozempic nammasaš diabetesdálkasa refušuvdnagolut leat hirbmadit lassánan jagi 2019 rájes, ja refušuvdnagolut dahket dál birrasiid logi proseantta álbmotoaju ollislaš dálkkasgoluin.

Stuora oassi geavahusas manná buoidivuođa dikšumii mii lea alitreseapta-ortnega dohkkehuvvon geavahusa olggobealde. Alla gálvojearru dálkasii miehtá máilmmi lea dagahan ahte lea šaddan váttis dábuhit Ozempic máilmmiviidosaččat.

Njeallje doaibmabiju suoidnemánu 1. beaivvi rájes

– Ráđđehus áigu sihkkarastit ahte olbmot dábuhit diabetesdálkasiid ja áigu unnidit álbmotoaju goluid. Danne mii árvalat njeallje doaibmabiju reviderejuvvon nationálabušeahtas, mat galget leat fámus suoidnemánu 1. b. rájes dán jagi, cealká dearvvašvuođa- ja fuolahusministtar Jan Christian Vestre.

– Doaibmabijuid ollislaš váikkuhus buorida háhkanvejolašvuođa pasieanttaide geat galget geavahit dálkasiid, seammás go mii buorebut nagodit stivret álbmotoaju goluid.

Golbma dáin doaibmabijuin gusket Ozempic-dálkasii:

• Nuppástuhttit ovddalgihtii dohkkehuvvon refušuvnna oktagaslaš doarjjan,
• heaittihit olgoriikkalaš páhkaid refušuvnna,
• ja muddet vuovdima apotehkain.

Láhkaproposišuvdna dálkkasgearggusvuođa birra

Ráđđehus lea aiddobáliid almmuhan láhkaproposišuvnna dálkkasgearggusvuođa birra gos earret eará evttohuvvo ahte jus lea váttis dábuhit dálkasiid Norggas, de sáhttá ásahit vuovdin- ja juohkingáržžidemiid dálkasiidda apotehkain ja grossagávppálaččaid bealis.

Dasa lassin evttoha ráđđehus addit refušuvnna Rybelsus dálkasa dáfus, mii sáhttá geavahuvvot jus Ozempic váilu. Dát gáibida Stuoradikki miehtama.

Medisiinnalaš buktagiid direktoráhta/Direktoratet for medisinske produkt  (DMP) lea ovdal álggahan doaibmabijuid buoridan dihte diehtojuohkima, čielggadan gáibádusaid mat gusket alitreseptii ja lea šiehtadallan hattiid dálkkasbuvttadeddjiin.

Eambbo iešguđetlágan diabetesdálkasat

Doaibmabijut eai leat dagahan ahte refušuvdnaeavttut leat buorebut čuvvojuvvon dahje ahte gollostivren lea buorránan.

Sihkkarastin dihte ahte diabetespasieanttat dábuhit dárbbašlaš dálkasiid dán dilis go lea jotkkolaš dálkkasváili, de ferte ásahit garraset doaibmabijuid.

– Dát doaibmabijut dagahit ahte guoskevaš divššohasjoavku dábuha eambbo iešguđetlágan diabetesdálkasiid, ja ráddje dárbbu geavahit divrras, olgoriikkalaš Ozempic-páhkaid, dadjá Vestre.

– Olgoriikkalaš páhkat sáhttet leat golmma gitta čieža geardde divraseappot go Norgga páhkat, danne go vuovdit sáhttet friddja mearridit vuovdinhatti. Vuovdima mudden apotehkain addá vejolašvuođa vuoruhit pasieanttaid geat dárbbašit Ozempic eanemus.