Nissonolbmo vuoigatvuođat lea deháleamos hilgunvejolašvuođas

Doaktárat ožžot vejolašvuohta biehttalit čujuheames nissonolbmuid abortii dušše go dat ii rihko nissonolbmo vuoigatvuođa oažžumis jođánis čujuhusa. Dát lea guovddážis gulaskuddancealkámušas fástadoaktáriid hilgunvejolašvuođa birra.

Maŋimus mánuid lea leamašan ollu fuomášupmi dasa ahte muhtun báikkiin riikkas lea leamašan bargovierru mii lea rihkkon njuolggadusaid sihke prevenšuvnnaid addimis ja čujuheames abortii.

- Hilgunvejolašvuohta man mii dál sáddet gulaskuddamii ii gáržžit abortalága. Baicca nuppe ládje. Dat čavge bargovieruid mat máŋggaid jagiid leat doaibman ja rihkkon njuolggadusaid, dadjá dearvvašvuođa- ja fuolahusministtar Bent Høie.
Suohkandearvvašvuođabálvalusa doaktáriin ii leat riekti biehttaleames čujuheames abortii iige diŋgot prevenšuvnna. Dan eai oaččo ođđa biehttalanvejolašvuođa árvalusainge. Muhto sii ožžot vejolašvuođa biehttalit čujuheames abortii jus dat ii rihko nissonolbmo rievtti oažžut jođánis čujuhusa buohccivissui jus ieš háliida abortta.

- Mu mielas lea positiivvalaš láhččet vejolašvuođa doaktáriidda čađahit ehtalaš jurddašeami, eaige dušše automáhtalaččat doaimmahit dan maid stáhta mearrida. Mii galgat doahttalit sin geat atnet abortta ehtalaš váttisin – vaikko leatge doaktárat, dadjá Høie.
Doaktáriidda ii mieđihuvvo vejolašvuođa biehttalit čállimis reseapta sidjiide geat jearahit prevenšuvnna dahje áigot bijahit spirála. Ii oktage nissonolmmoš galgga vásihit váttisvuođa jus su doavttir biehttala čujuheames su buohccivissui. Danin leat árvalussii, mii dál sáddejuvvo gulaskuddamii, čállojuvvon máŋga eavttu:

• Nissonolbmot geaid fástadoavttir ávkkástallá hilgunvejolašvuođa, galget oažžut beassat ráđđádallat eará doaktáriin guhte lea das lahkosis ovdal nuppi bargobeaivvi.
• Fástadoaktárat geat ávkkástallet biehttalanvejolašvuođa galget duođaštit ahte sii lea šiehtadan eará doaktáriin guhte geatnegahttojuvvo čađahit daid konsultašuvnnaid mat lea abortta birra.
• Fástadoaktárat geat geavahit hilgunvejolašvuođa galget dakkaviđe dan dieđihit reivve bakte iežas divššohasaide. Dát dagaha ahte divššohasain lea riekti molsut fástadoaktára.

Suohkan dat sáhttá čađahit biehttalanšiehtadusa fástadoaktáriiguin. Muhto suohkan sáhttá dohkkehit dákkár šiehtadusa dušše dalle go doaktárii gullevaš nissonlaš divššohasaide lea fállojuvvon vejolašvuohta oažžut eará abortačujuhusa, almmá vuoigatmeahttun hehttehusaid. Suohkanis dat lea ovddasvástádus fuolahit ahte leat doarvái fástadoaktárat geat eai leat ávkkástallan hilgunvejolašvuođa, ja suohkan sáhttá maiddái lihccut hilgunsoahpamuša jus nissonolbmuid vuoigatvuohta oažžut jođánis čujuhusa abortii dahje molsut fástadoaktára ii ollašuhttojuvvo.

Suohkan geatnegahttojuvvo dieđihit álbmogii jus fástadoaktárat geavahit vejolašvuođa hilgut čujuheames nissonolbmuid abortii.

Loga gulaskuddandokumeanttaid fástadoaktáriid hilgunvejolašvuođa birra (dokumeanttat leat dárogillii)