Ođđa ráddjehusat Norgii boahtima oktavuođas

– Mii háliidit hehttet njoammumiid olgoriikkas deike, ja čavget danin riikii boahtima eavttuid skábmamánu 26. beaivve. Dan rájes fertejit buohkat registreret iežaset ovdal go bohtet Norgii. Dearvvašvuođafágalaš rávvagiid vuođul mii gáibidišgoahtit negatiiva bohtosa iskosis, mii lea váldojuvvon ovdal riikii boahtima. Dat guoská buohkaide, geat eai sáhte duođaštit dohkálaš koronaduođaštusain, ahte leat ollásit boahkuhuvvon dahje ahte sis lea leamaš covid-19 maŋimuš guđa mánus. Dat guoská geahčakeahttá dasa man riikkas mátkkošteaddji boahtá, dadjá justis- ja gearggusvuođaministtar Emilie Enger Mehl (Gb). 

Dát leat riikii boahtima mávssoleamos rievdadusat, mat gustogohtet skábmamánu 26. beaivve:

• Gáibiduvvo, ahte buohkat geat bohtet riikii, galget registrerehit iežaset riikii boahtima registrerenvuogádahkii. Spiehkastahkan leat vuollái 16-jahkásaš mánát ja dihto joavkkut. Buohkat, geat bohtet riikii, leat geatnegasat čájehit registrerenduođaštusa ja vejolaš koronaduođaštusa politiijaide dárkkisteami oktavuođas.
• Riikii besset boahtit buot olgoriikalaččat, geain lea vuoigatvuohta boahtit riikii olgoriikalaččaidlága vuođul.
• Mearrajohtolatdirektoráhta ja Eanandoallodirektoráhta ohcanortnegat heaittihuvvojit.
• Sáhttet ain biehttalit olgoriikkalaččaid boahtimis riikii, jos sii eai riikii boađedettiin deavdde gáibádusaid, mat gusket riikii boahtima registreremii, erremii ja iskkaheapmái. Duođaštusaid váilun sáhttá mielddisbuktit ahte ii beasa riikii. Buot mátkkošteaddjit, maiddái norgalaččat, sáhttet váidot ja maiddái sáhkohallat jos eai bargga dan masa sii leat geatnegasat riikii boahtima oktavuođas.
• Mii gáibidišgoahtit fas duođaštusa negatiiva iskosis, mii lea váldojuvvon 24 diimmu siste ovdal riikii boahtima. Gáibádus guoská sidjiide, geat eai sáhte duođaštit koronaduođaštusain, maid sáhttá verifiseret, ahte sii leat ollásit boahkuhuvvon dahje ahte leat buohcan covid-19 maŋimuš guđa mánus. Gáibádus guoská buohkaide geahčakeahttá dasa guđe riikkas sii bohtet, muhto ii vuollái 18-jahkásaš mátkkošteddjiide.
• Rievdadit maiddái geatnegasvuođa iskkahit iežaset riikii boađedettiin. Geatnegasvuohta gusto geahčakeahttá dasa gos mátkkošteaddji boahtá Norgii. Dássážii geatnegasvuohta lea guoskan dušše olbmuide, geat leat boahtán guovlluin, maidda guoská errengeatnegasvuohta. Iskkahangeatnegasvuohta guoská buohkaide, geat eai sáhte koronaduođaštusain duođaštit ahte leat ollásit boahkuhuvvon dahje ahte leat buohcan covid-19 maŋimuš jahkebealis. Eará spiehkastagat iskkahangeatnegasvuođas Norgii boahtima oktavuođas doalahuvvojit.
• Dat geat leat geatnegasat iskkahit iežaset sáhttet dahkat dan iskanstašuvnnas rájá alde dahje 24 diimmu siste jos rájás ii leat iskanstašuvdna. Buot riikka gielddain galget leat gergosat váldit iskosiid riikii boahttiin, geat leat geatnegasat iskkahit iežaset.
• Mii bidjat bargiid riikii boahttiid gozihanguovddážii (Nasjonalt kontrollsenter for innreisende). Doppe váldigohtet fas iskosiid ja gielddat ožžot dieđuid mátkkošteddjiid birra, geaid gielddat berrejit čuovvulit.
• Ráđđehus ii rievdat riikiiboahtinerrema. Errennjuolggadusat gustojit dálá dieđuid mielde olles dálvvi.

Errenhoteallaortnet doalahuvvo sin várás, geain ii leat eará heivvolaš orrunbáiki.