Ođđa veahkaváldebuhtaduslága gaskaboddosaš njuolggadusat leat mearriduvvon
Preassadieđáhus | Nr: 122 – 2022 | Almmustahtton: 02.12.2022 | Maŋimuš ođasmahttojuvvon: 20.12.2022 | Justiisa- ja gearggusvuođadepartemeanta
Ráđđehus lea mearridan ođđa lága buhtadeami birra stáhtas sidjiide geat leat vásihan veahkaválddi, veahkaváldibuhtadusláhka mii boahtá fápmui ođđajagimánu 1.b.2023. Ođđa láhkii leat gaskaboddosaš njuolggadusat mearriduvvon odne.
Gaskaboddosaš njuolggadusaid ulbmil lea čielggadit áššečuolmmaid mat sáhttet čuožžilit veahkaváldibuhtadusgáibádusa meannudeami oktavuođas ovdal go ođđa láhka boahtá fápmui. .
-Lean ilus go gaskaboddosaš njuolggadusaid dál leat sajis, maid vuođul sii geat ovdal leat vásihan veahkaválddi sáhttet ohcat buhtadusa. Dainna lágiin ožžot sii, geat eai leat fuomášan ahte ođđa lága mielde rievdaduvvui ohcanáigemearri, buoret áiggi ohcat, dadjá justiisa- ja gearggusvuođaministtar Emilie Enger Mehl (Gb).
Gaskaboddosaš njuolggadusaid mielde lea earret eará vejolaš maŋidit ohcanáigemeari áššiin mat leat mearriduvvon ovdal ođđajagimánu 1.b.2023. Áigemearri ohcat buhtadusa daid áššiin rehkenastojuvvo dan rájes go láhka boahtá fápmui, ii ge riektevuoimmalaš duomu dahje áššáskuhttinmearrádusa maŋŋil. Jos riektevuoimmalaš duopmu lea celkojuvvon ovdal ođđajagimánu 1.b. 2023, de sáhttá veahkaválddi gillájeaddji ohcat buhtadusa Veahkaváldegillájeaddjibuhtadusa kantuvrras gitta suoidnemánu 1.beaivvi 2023 rádjai. Jos áššáskuhttineiseváldi mearrida ášši loahpalaččat ovdal ođđajagimánu 1.b.2023, de sáhttá veahkaválddi gillájeaddji ohcat buhtadusa Veahkaváldegillájeaddjibuhtadusa kantuvrras gitta ođđajagimánu 1.b.2024 rádjai.
Gaskaboddosaš njuolggadusaid mielde galgá Stáhta Siviilariektehálddahus (SRF) meannudit váiddaáššiid mat leat mearriduvvon boares láhkanjuolggadusaid vuođul, ja SFR lea maid ožžon válddi rievdadit áššiid maid Buhtaduslávdegoddi veahkaváldegillájeddjiid várás lea meannudan.