Eambbo bargat cielaheami ja rasisma vuostá maid boazobargit vásihit

Ollu boazobargit Norggas vásihit cielaheami ja rasisma. Mihá – Nuorra sápmelaččaid psyhkalaš dearvvašvuohta raporttas boahtá ovdán ahte golmmas njealji nuorra sápmelaččas leat vásihan vealaheami earret eará čearddalašvuođa, sohkabeali ja orrunbáikki dihte. 41 proseanta muitalit dan seamma iskkadeamis ahte leat vásihan cielaheami máŋgga geardde jagis, ja olles 95 proseanta sámi nuorain muitalit iežaset vásihit ahte stuora servodagas leat ovdagáttut sámi kultuvrra vuostá. Vásáhusat mediaid kommentárafealttain ja sosiálamediain nannejit dan maid iskkadeapmi čájeha.

– Eastadit cielaheami ja rasisma lea mávssolaš ja dárbbašlaš bargu. Ii oktage galgga dárbbašit vásihit cielaheami ja rasismma, lohká Eanandoallo- ja biebmoministtar Sandra Borch.

Boazodoallošiehtadusa šiehtadallamiin 2022/2023 sohpe šiehtadallit čađahit prošeavtta cielaheami ja rasisma vuostá, maid boazobargit vásihit. Okta dehálaš ulbmil dainna prošeavttain lea dakkár váttisvuođaide oččodit álbmogii eambbo diđolašvuođa ja lasihit máhttodási.

Oassi prošeavttas lea earret eará ahte jotket Reinfakta konseapttain. Reinfakta.no lea neahttasiidu, man ulbmil lea unnidit cielaheami ja oččodit eret ovdagáttuid, mat leat boazobargiid ja boazoealáhusa birra, go gaskkustit fáktádieđuid ja muđui dieđuid boazoealáhusa birra.

– Eambbo máhttu addá olbmuide eambbo ipmárdusa boazoealáhusa ja boazobargiid birra ja dainna lágiin eastada maid cielaheami ja rasismma. Iešguđetlágan kanálaid, nugo turistaservviid, suohkaniid ja stádahálddašeddjiid bokte, dieđihuvvo dál ahte boazoealáhusas lea dál guottetáigi, ja dan áigodagas leat áldu ja miessi earenoamáš hearkkit muosehuvvamii. Go galgá oažžut eambbo ipmárdusa manne nu lea, de ávžžuhan iskat reinfakta.no neahttasiiddu. Doppe sáhttá gávdnat dieđuid manne lea dehálaš ahte olbmot, geat vánddardit luonddus, vuhtiiváldet boazoealáhusa ja sáhttet oažžut árvalusaid movt dan sáhttá dahkat, lohká Borch.

Rievdadit olbmuid guottuid ja oažžut eret cielaheami, maid boazobargit vásihit dál, lea guhkes áiggi bargu, mii gáibida jotkkolašvuođa ja ahte máŋga iešguđetlágan aktevrra barget dainna. Okta ulbmil joatkit dainna prošeavttain lea ahte bargu, mainna eastada cielaheami ja rasisma boazobargiid vuostá, sáhttá leat oassin Norgga Boazosápmelaččaid Riikkasearvvi dábálaš barggus.