Ollislaš lassiárvodivatbuhtadus ja 2,65 miljárdda eaktodáhtolašvuhtii ja falástallamii

– Nie nannet mii eaktodáhtolašvuođa ja ovddidit doaimmaid ja searvama miehtá riikka. Ráđđehus háliida ahte mánáin ja nuorain galget leat ovttalágan vejolašvuođat. Eambbo ruhta eaktodáhtolaš organisašuvnnaide ja falástallanservviide mearkkaša ahte eambbo mánát ja nuorat besset oasálastit kultur- ja falástallandoaimmain, dadjá kultur- ja dásseárvoministtar Lubna Jaffery.

Ortnega bokte buhtaduvvo organisašuvnnaide lassiárvodivada gollu go ostet gálvvuid ja bálvalusaid. Ortnet lea álki, dat ii leat byråkráhtalaš, ii ge das leat raporterengáibádus.

Diibmá ožžo olles 23 000 organisašuvnna ruđaid ortnegis, main eanas ledje smávva searvvit.

Jahkái 2025 árvala ráđđehus lasihit ortnega 210 miljovnna ruvnnuin gitta oktiibuot 2,65 miljárdda ruvdnui.

Maiddái rusttegiidda ollislaš buhtadus

Ráđđehus árvala dasa lassin ollislaš lassiárvodivatbuhtadusa falástallanservviide hukset falástallanrusttegiid, ja juolludit lagabui 390 miljovnna ruvnno dasa. Falástallanrusttegat leat mávssolaččat dasa ahte mánáide ja nuoraide láhččo dilli nu ahte sáhttet oasálastit falástallandoaimmain ja vásihit birgema ja searvevuođa.

– Dáinna lágiin ollašuhttá ráđđehus Hurdaljulggaštusa lohpádusa ahte juolludit ollislaš lassiárvodivatbuhtadusa maiddái 2025:s. Dan mii leat dahkan juohke jagi álggaheami rájes, maid ii oktage ráđđehus ovdal leat nagodan. Oktiibuot leat mii lasihan ortnega 900 miljovnnain ruvnnuin Solberg-ráđđehusa maŋimuš bušeahttaárvalusa rájes, dadjá Jaffery.