Ovdal juovllaid fállojuvvo ođasmahttindosa (lassiboahkut) buohkaide, geat leat deavdán 65 jagi, ja gielddat sáhttet váldit atnui koronaduođaštusa.
Ođas | Almmustahtton: 22.11.2021 | Dearvvašvuođa- ja fuolahusdepartemeanta
Dearvvašvuođa- ja fuolahusministtar Ingvild Kjerkol ávžžuha ge gielddaid ovdal juovllaid juo fállagoahtit ođasmahttindosa buohkaide, geat leat deavdán 65 jagi.
-Boahkut suddjejit bures njoammuma ja dávdda vuostá, muhto boahkuid beaktu váidu áiggi mielde. Erenoamážit boarrásepmosiid ektui. Danne lea hirbmat dehálaš ahte sii ožžot goalmmát boahku dahje nu gohčoduvvon ođasmahttindosa nu johtilit go vejolaš, dadjá Kjerkol.
Ollugat sis geat dál leat šaddan buohccevissui leat boarrásat geat boahkuhedje iežaset giđđadálvvi.
Gielddat galget maid fuolahit ahte 16-17 jahkásaččat ožžot nuppi boahkkodosa dál. Dat hehtte koronadávdda njoammumis dien ahkejoavkkus.
-Muhto eai leat dušše gielddat mat fertejit doaimmaid ásahit. Mii fertet maid váldit ovddasvástádusa. Ollugat mis eai čuovo rávvagiid ahte bissut ruovttus jos lea buohcci. Danne njommot ja levvet iešguđetlágan virusat ja koronavirus hirbmat johtilit min servodagas. Dat mielddisbuktá ahte njoammudávda lassána ja ahte eanet olbmot buohccájit, mii fas dagaha váttisvuođaid ja hástalusaid dearvvašvuođabálvalussii, čujuha dearvvašvuođa- ja fuolahusministtar.
Koronaduođaštus
Gielddat mat leat ásahan koronadávdda eastadandoaibmabijuid, sáhttet dál váldit atnui koronaduođaštusa addin dihte geahpádusaid sidjiide geat ollásit leat boahkuhuvvon ja sáhttet duođaštit negatiivva covid-19 iskosa maid leat válddihan 48 diimmu siste. Koronaduođaštusa ožžot maiddái sii, geat eai leat válddihan boahkuid.
Ođđa láhkaásahus dohkkehuvvon skábmamánu 19.beaivve dahká dan vejolažžan. Eaktun vai gielddat besset geavahišgoahtit duođaštusa lea, ahte sii leat ásahan njoammuneastadandoaimmaid.
-Gielddat galget maid fállat nuvttá jođánisiskosiid sidjiide geat eai leat boahkuhuvvon. Doaluid ja lágidemiid oktavuođas eaktuduvvo, ahte koronaduođaštusa galgá dárkilastit dárkkistansiidduin čájehan dihte fámolašvuođa. Mánát ja nuorat vuollel 16 jagi eai dárbbaš koronaduođaštusa, čujuha Kjerkol.
Dearvvašvuođadirektoráhta áigu gielddaid várás ráhkadit bagadusa koronaduođaštusa geavaheami birra.
-Mii háliidat ahte servodat galgá beassat doaibmat nu rahpasit go vejolaš, ja ahte gielddat gos njoammudávda leavvá ásahit eastadandoaimmaid. Mii doaivut ahte láhkaásahus veahkeha daid gielddaid gos lea ollu koronanjoammun ásahit báikkálaš njoammuneastadandoaimmaid. Mii oaivvildat ahte koronaduođaštus vuhtiiváldá ealáhuseallima ja priváhta olbmuid beroštumiid ja ii ge ráddje dábálaš doaibmanvejolašvuođaid, dadjá Kjerkol.
Belohahkii boahkuheapmi ii atte vejolašvuođa spiehkastit báikkálaš ráddjehusain.
Álggos dušše báikkálaš dásis
Alitivnnat EO-koronaduođaštus galgá dál geavahuvvot Norggas. Dušše gielddat mat leat ásahan njoammuneastadandoaimmaid sáhttet geavahišgoahtit koronaduođaštusa. Dárkkis makkár koronaduođaštussii guoski njuolggadusat gustojit iežat gielddas.
Ráđđehus áigu maid árvvoštallat dárbbu geavahit koronaduođaštusa eanet oktavuođain riikka siste, muhto dasa gáibiduvvo láhkarievdadus.
-Mii áigut geahčadit lea go vejolaš geavahit koronaduođaštusa eastadeaddji doaibmabidjun hehtten dihte ráddjehusaid ja njoammunlassáneami. Dat gáibida vuđolaš politihkalaš, ehtalaš ja juridihkalaš árvvoštallamiid, ja mii máhccat áššái maŋŋil, dadjá Kjerkol.
- Koronaduođaštus čájeha leat go ollásit boahkuhuvvon, lea go dus leamaš covid-19-dávda ja lea go koronaiskkus negatiivva. Geavat helsenorge-áppa ja viečča koronaduođaštusa doppe, dahje logge sisa helsenorge.no neahttabáikái.
- Koronaduođaštus lea alitivnnat. Dat ii leat ruoná ii ge ruoksat, nu go ovddit nationála dárkkistansiidu.
- Mánát eai dárbbaš koronaduođaštusa, muhto váhnemat sáhttet neahtas vieččat koronaduođaštusa mánáide, ovdamearkka dihte jos áigot mátkkoštit dakkár riikkas gos dat gáibiduvvo.
- Buohkat ožžot koronaduođaštusa, geain lea riegádannummir dahje d-nummir ja geain leat boahkuhandieđut, negatiivva koronaiskkus dahje buohcan koronadávddas.
- Almmolaš lágidemiin
- Guossohanbáikkiin
- Hárjehallanguovddážiin ja vuojadanhállain
- Kinos, teáhteris, konsearttain, museain, suohtastallanpárkkain ja vástideaddji kultur- ja guoimmuhanbáikkiin