Psyhkalaš dearvvašvuohta lea dehálaš eanandoalus ja boazodoalus

– Boanda ja boazodoalli bargaba lossa ja muhtomin oktonas bargguid, ja lea mávssolaš ahte mii maŋemus jagiid leat eanet deattuhan psyhkalaš dearvvašvuođa ealáhusas. Lea dehálaš biebmoháhkamii ahte boanddat ja boazodoallit leat dearvašat. Danne lea buorre go mii bidjat eambbo fuomášumi boanddaid ja boazodolliid psyhkalaš dearvvašvuhtii, dadjá eanandoallo- ja biebmoministtar Geir Pollestad.

Golggotmánu 10. beaivi lea psyhkalaš dearvvašvuođa máilmmibeaivi. Psyhkalaš dearvvašvuođa máilmmibeaivi lea nationála álbmotkampánja mii čalmmustahttojuvvo Norggas, muhto maiddái olgomáilmmis. Min riikkas áŋggirdit sihke organisašuvnnat ja bargosajit gaskkustit máhtu, ipmárdusa ja rabasvuođa psyhkalaš dearvvašvuođa birra. Dat guoská maiddái eanandollui ja boazodollui.

Maŋimus jagiid leat máŋga dutki guorahallan boanddaid psyhkalaš dearvvašvuođa. Jagi 2022 DBS-kártemis oassálaste badjel 9000 boandda. 9 proseantta sis vástidedje ahte sii dávjá dahje muhtomin leat jurddašan ahte sis livččii galgan leat profeššunealla veahkki psyhkalaš váttisvuođaid čoavdimii maŋemus jagi. Sullii 30 proseantta vástidedje ahte sii fuolastuvvet muhtin oahpes boandda psyhkalaš dearvvašvuođain.

Ruralis lea ovttas boazodoalu DBS-ráđđeaddiiguin kárten boazodoalu DBS-dili, earret eará psyhkalaš huša. Das boahtá ovdan ahte boazodoallit dovdet psyhkalaš huša guohtunroasuid oktavuođas, bohccuid massima geažil boraspiriide ja eatnamiid massima geažil huksendoaimmaide.

Roasut dahje eará noađit sáhttet dovdot lossadin go olmmoš lea akto. Boanddain ja boazobargiin leat sihke bargu, bearaš ja astoáigi dávjá hui lávgalaga. Sii maid sáhttet vásihit seammalágan givssiid go buohkat earát, muhto noađđi sáhttá muhtomin šaddat stuorisin go sihke bargá ja orru seammá báikkis. Sihke buozalmasvuohta, aktonasvuohta ja ekonomiija leat dakkárat mat dagahit ahte árgabeaivi sáhttá šaddat lossadin.

– Mun sávan ahte eanet boanddat jearaše bargoguimmiineaset movt manná, ja guovlalivčče liige gáfestallanmohkáža ránnjá luhtte. Eastadan dihte psyhkalaš váttisvuođaid nu bures go vejolaš, de eai berre dieđut ja doaibmabijut heivehuvvot dušše boanddaide ja boazodolliide, muhto maiddái fierpmádagaide sin birra.

– Jus olmmoš fuolastuvvá ahte soapmásis ii leat buorre dilli, de berre dahkat dainna juoidá. De sáhttá jearrat sus movt manná, dahje sáhttá bivdit veahki Norgga Eanandoalloráđđeaddinbálvalusa (dárogillii Norsk Landbruksrådgivning, NLR) DBS-bálvalusas, dahje eará aktevrrain geat sáhttet veahkehit.

NLR:s lea DBS-bálvalus ja lea čadnon fitnodatdearvvašvuođaásahusaide miehtá Norgga. Sii fállet maid heahteveahki. Fálaldat lea nuvttá vuosttašceahkkefálaldat, beroškeahttá lea go miellahttu vai ii. NLR:s lea maid lagas ovttasbargu eará eanandoalloorganisašuvnnaiguin.