Ráđđehus nanne áŋgiruššama veahkaválddi ja illastemiid vuostá

Ođas | Almmustahtton: 08.10.2024 | Dearvvašvuođa- ja fuolahusdepartemeanta

2025 stádabušeahtas árvala ráđđehus juolludit gávcci miljovnna ruvnno doaibmabijuid čuovvuleapmái Buoridanplánas, mas ulbmil lea eastadit veahkaválddálašvuođa ja illasteami mánáid vuostá ja veahkaválddálašvuođa lagas oktavuođain. Árvaluvvo vihtta miljovnna ruvnno digitála váhnendoarjagii ja nannet TryggEst doaimma golmmain miljovnnain.

- Mánáid veahkaválddálašvuohta ja illasteapmi ja veahkaválddálašvuohta lagas oktavuođain guoskkaha eambbogiid go dat maid mii liikot jáhkkit. Mii fertet bargat eambbo vai eastadit veahkaválddálašvuođa, ja fuolahit ahte gillájeaddjit čuovvuluvvojit ja fuolahuvvojit. Dát juolludeamit galget dan dahkat, dadjá dearvvašvuođa- ja fuolahusministtar Jan Christian Vestre.

TryggEst lea ráhkaduvvon reaidu, mainna veahkeha suohkaniid áimmahuššat riskkavuloš ássiid, ja veahkehit eastadit, fuomášit ja gieđahallat veahkaválddálašvuođa ja illastemiid dán joavkku vuostá. Suohkaniidlohku, mat leat váldán atnui TryggEst reaiddu, lea lassánan 28 suohkanis 2022 gitta 55 suohkanii 2023. Leat vel boahtán ohcamušat 27 ođđa suohkanis mat háliidit váldit atnui TryggEst 2024.