Ráđđehus sihkkarastá Romssaiskkadeami čađaheami

– 50 jagi lea Romssaiskkadeapmi addán midjiide mávssolaš dieđuid iešguđetlágan dearvvašvuođahástalusaid birra. Mii leat njulgestaga buoret ja dearvašet álbmot danne go romsalaččat mihtet iskkahit iežaset. Mun lean ilus go Romssaiskkadeapmi dáinna ruđain sáhttá álggahit iežas gávccát iskkadeami 2025:s, dadjá dearvvašvuođa- ja fuolahusministtar Jan Christian Vestre.

1974 rájes lea Romssaiskkadeapmi buvttadan dehálaš dieđuid mat leat buoridan servodaga ipmárdusa álbmotdearvvašvuođas, ja dainna lágiin sihkkarastán máhtu mii lea ávccá dárbbašlaš dearvvašvuođabálvalusaid ja eastadeaddji doaibmabijuid heiveheamis álbmoga dárbbuide. Gávccát iskkadeapmi geahčada dárkileappot vuorrasiid dearvvašvuođa ja sosiála erohusaid dearvvašvuođas, ja addá dieinna lágiin máhtu álbmoga dearvvašvuođas, váikkuheaddji fáktoriin dearvvašvuhtii ja ovdáneamis áiggi badjel.

– Dát iskkadeapmi addá midjiide mávssolaš dieđuid, ja lea erenoamáš dehálaš go dat čađahuvvo jeavddalaččat ja guhkit áiggi badjel, nu ahte mis lea buohtastahttinvuođđu. Romssa-iskkdeapmái leat searvan ollu olbmot, ja mun sávan ahte nu oallut romsalaččat go vejolaš, geat leat 40 jagi dahje boarráseappot, servet iskkadeapmái maiddái dán háve, dadjá dearvvašvuođa- ja fuolahusministtar.