Boazodoallu – áidnalunddot máisttut ja vásáhusat

– Boazodoallovuđot mátkeealáhus lea máŋggaid jagiid vásihan jearrolassáneami. Dehálaš lea ahte hoteallat ja restauránttat fállet bohccobierggu, ja ahte sii muitalit gos biergu boahtá ja mo dat lea ráhkaduvvon. Nu besset guossit muosáhit buori mállása seammás go ožžot eanet máhtu báikkálaš biebmu ja historjjá birra, erenoamážit áidnalunddot ealáhusa birra, dadjá eanadoallo- ja biebmoministtar Geir Pollestad (GB). 

Olles árvogollosa márkandiđolaš buvttaovddideami ja profešonaliserema bokte duoddaris gitta beavdegurrii lea fuomášupmi Norgga bohccobirgui lassánan. Buoret vejolašvuohta gávdnat bagadusaid mo ráhkadit sihke árgabeai- ja riepmomállásiid bohccobierggus earret eará neahttasiiddus Matprat, lea dagahan álkibun geavaheddjiide válljet dán álbmás ja dearvvašlaš bierggu.

Sihke stuorra fitnodagain ja smávva bearašfitnodagain cáhpet ja muohkadit bohccobierggu. Fitnodagaid álgoávnnasmuohkadeapmi mearkkaša hui ollu árvoháhkamii, ja dasa ahte máŋggalágan kvalitehtabuktagat leat fidnemis buvddain ja restauránttain. Danne lea dáid fitnodagaid viidásat ovddideamis stuorra mearkkašupmi bohccobiergomárkana ovddideapmái.

– Bohccobierggu válljen ovtta váldobiebmoávdnasiin Bocuse d’Or nammasaš goahkkagilvvohallamis lea sajáiduhttán bohccobierggu dohko gosa dat gullá: buoremus álgoávdnasiid gaskii. Válljejupmi čájeha ahte boazodoallu sáhttá lágidit dakkár kvalitehta maid buoremus ođđaáiggi gohkkendáidda jearaha, dadjá Pollestad.

Boazodoalus lea eanet maid fállat

Boazodoallu fállá sihke máisttu ja vásáhusaid turisttaide. Gálvvuid ja bálvalusaid fállan iežas doalu vuođul addá vejolašvuođa gaskkustit máhtu iežas ealáhusa, kultuvrra ja sámegiela birra. Dat lea mielde nannemin bearašvuđot boazodoalu ekonomiija.

Máŋga boazodoallovuđot mátkeealáhusfitnodaga fállet oahppan- ja fuolahusbálvalusaid sámi kultuvrra, árbevieruid, duoji, historjjá, olbmuid, elliid, luonddu ja boazodoalu vuođul. Bálvalusat mat fállojit Duoddarii nammasaš goavddi vuolde, leat bálvalusat mat leat heivehuvvon ovttaskasolbmuide dahje joavkkuide iešguđet eallindiliin. Dat galgá addit persovnnalaš ovdáneami oahppama, hálddašeami ja sosiála searvevuođa bokte.

Boazodoalus lea vierrun ávkkástallat buot ealli osiiguin. Dat oasit eallis maid ii sáhte borrat, nugo duolji ja čorvviid, geavahuvvojit earret eará biktasiidda, reaidduide ja čiŋaide. Dát árbediehtu fuolahuvvo buoremusat boazodoallobearraša árjjalaš geavaheami ja máhttosirdima bokte buolvvaid gaskkas.