Sandra Borch Nordlándii ja Finnmárkui
Ođas | Almmustahtton: 25.02.2022 | Eanadoallo- ja biebmodepartemeanta
Eanadoallo- ja biebmoministtar vuolgá boahtte vahkus Nordlándii deaivvadit boazodolliiguin, geat dál vásihit duođalaš guohtunroasu. Maŋŋelaš dán dálvvi vuolgá son Finnmárkui.
Skábmamánus ja juovlamánus boahtigohte vuosttaš dieđut heajos guohtumiid birra. Guohtuneatnamat leat hedjonan vel eanet dálvvi mielde, go ollu jiekŋa eatnama alde ja muohta leat dagahan ahte boazu ii beasa guohtut.
Nordlándda ja Romssa ja Finnmárkku Gearggusvuođalávdegottit leat dieđihan guohtunroasu ollu orohagain. Fuođđarat dolvojuvvojit dohko gos ealut leat guoskevaš orohagain.
Hirpmástuvvan stáhtaráđđi
Eanadoallo- ja biebmoministtar áigu deaivvadit boazodolliiguin geat dál vásihit duođalaš guohtunroasu iežaset siiddain ja orohagain, sihke Nordlánddas ja Finnmárkkus. Ikte lei sus ságastallan heahtegearggusvuođalávdegottiiguin oažžun dihte eanet dieđuid guohtunroasus.
Heahtegearggusvuođalávdegottiid jođiheaddjit muitaledje ealáhusa birra mii bures lea ráhkkanan ja nagoda hálddašit guohtunroasu. Jagi 2020 guohtunroasu vásáhusat leat ain muittus.
– Lean sakka hirpmástuvvan das man bures barggut čađahuvvojit, sihke ealáhusa bealis ja hálddahusas, dadjá eanadoallo- ja biebmoministtar Sandra Borch maŋŋil ságastallamiid.
– Mun lean ožžon ruovttoluottadieđuid ahte dat ođđa láhkaásahus erenoamáš juolludeami birra heahtegearggusvuhtii doaibmá bures, ja ahte ásahuvvon ortnegat veahkehit birget roassodilis. Muhto lea ágga deattuhit, ahte guohtunroassu lea roassu mii gáibida buori hálddašeami giđa miehtá.
Mun áiggun hui dárkilit čuovvut dili, ja háliidan gullat eanet hástalusaid birra go deaivvadan Nordlándda ja Finnmárkku boazoeaiggádiiguin, dadjá eanadoallo- ja biebmoministtar.
