Fágaolbmuid lokten min oktasaš dearvvašvuođabálvalusas

– Fágaolbmot leat min deaŧaleamos resurssat dearvvašvuođa- ja fuolahusbálvalusas, dasa ahte mii maiddái boahtteáiggis sáhttit fállat buori dearvvašvuođaveahki, beroškeahttá sisaboađus ja ássanbáikkis. Mii fertet buorebut láhčit buohccidivššáriid, dearvvašvuođabargiid, doaktáriid ja eará bargojoavkkuid barggu. Danne áigut geavahit 57,9 miljovnna kruvnno olahit beaktilet organiserema ja rievttes bargojuogu, lohká dearvvašvuođa- ja fuolahusministtar Ingvild Kjerkol.

Buorebut geavahit buohccidivššáriid ja dearvvašvuođabargiid áiggi

Okta doaibma stáhtabušeahta 2024 áŋgiruššamiin, lea Tørn-prošeakta KS olis, mas badjel 100 suohkana ovdánahttet pilohtavugiid, maid ulbmil lea ásahit eanet ollesáiggevirggiid ja ođđa bargovugiid, maid bokte dearvvašvuođabargiid áiggis ja gelbbolašvuođas olaha buoret ávkki.

– Eanet olles, fásta virggit, vuohkkaset turnusat ja buoret bargojuohku mii luvve áiggi pasieanttaide, leat deaŧalaš prinsihpat dasa ahte lasihit kapasitehta dearvvašvuođa- ja fuolahusbálvalusas. Danne árvala ráđđehus juolludit 57,9 miljovnna kruvnno Tørn-prográmmii (ks.no), mii dál viiddiduvvo guoskat olles dearvvašvuođa- ja fuolahussuorgái, iige dušše suohkaniid dearvvašvuođabálvalussii, lohká Kjerkol.

Tørn lea oassin ráđđehusa easkka álggahuvvon fágabargiloktemis, man ulbmil lea nannet dearvvašvuođa- ja fuolahusbargiid oahpaheami, rekrutterema ja gelbbolašvuođa. Ruhta galgá mannat earret eará dasa ahte nannet barggu olahit ulbmillaš bargojuogu iešguđetge bargojoavkkuid gaskka. Ráđđehus áigu ovttasbargat relevánta aktevrraiguin oažžun dihte áigái eambbo doaibmabijuid, mat oktiibuot dahket vejolažžan háhkat eanet fágabargiid.

Dearvvašvuođabargit geain lea oahppu eará riikkas

– Lea deaŧalaš ahte dearvvašvuođabargit, geat leat váldán oahpu riikkain olggobealde EEO, besset iežaset gelbbolašvuođa atnit Norggas, lohká Kjerkol.

– Dat lea deaŧalaš sihke bargiide alcceseaset ja dearvvašvuođa- ja fuolahusbálvalusaide mat dárbbašit gelbbolaš bargiid. Odne lea oalle divrras háhkat autorisašuvnna, ja fágaolbmot fertejit ieža máksit dáid goluid. Mii árvalit 20 miljovnna kruvnno dáid goluid unnideapmái.

Eambbo LIS1-virggit

Ráđđehus nanne maiddái LIS1-ortnega 66 ođđa virggiin.  

– LIS1 lea deaŧalaš go dat addá doaktáriidda oktasaš viidodatgelbbolašvuođa sin spesialistaoahpu álggus. Dan olis olahit doaktárat vuđolaš gelbbolašvuođa ja oadjebasvuođa iežaset barggus, dadjá Kjerkol.