Lasihuvvon doarjja 1500 birrajándor fuolahussadjái

Investerendoarjja birrajándora fuolahussajiide galgá veahkehit suohkaniid sihke ođasmahttit ja lasihit sajiid buhcciidruovttuin ja fuolahusásodagain olbmuide geat dárbbašit dearvvašvuođa- ja fuolahusbálvalusaid birra jándora.

– Min áigumuš lea dahkat boarrásiidda oadjebassan orrut ruovttus nu guhká go ieža háliidit. Seammás lea čielggas ahte eai buohkat sáhte orrut ruovttus. Sii geat dárbbašit buhcciidruovttus saji, galget oažžut dan, nanne dearvvašvuođa- ja fuolahusministtar Ingvild Kjerkol.

Tørn-prošeavtta ovdánahttin

Ráđđehus árvala maiddái 75 miljovnna kruvnno lassidoarjjan čuovvulit gelbbolašvuođaoasi bu trygt heime-ođastusas (ása oadjebasat ruovttus), mii ovddiduvvui loahpas geassemánu dán jagi.

58 miljovnna kruvnno dán ruđas lea árvaluvvon Tørn-prošeavtta (ks.no) viiddideapmái. Tørn lea ođđa bargo- ja organisašuvdnavugiid geahččalanortnet, man ulbmil lea buorebut geavahit dearvvašvuođabargiid gelbbolašvuođa ja áiggi, ja dan bokte addit buoret bálvalusaid min ássiide.

– Tørn-prošeakta lea okta min deaŧaleamos doaibmabijuin dustet hástalusaid, mat mis leat bargiid hárrái. Vuogádaga huksejit luohttevašolbmot ja fágaolbmot vuolil bajás, ja ulbmil lea ásahit eanet ollesáiggevirggiid, bargiid geain leat dearvvašvuođafágalaš gelbbolašvuohta, ja oččodit buori bargojuogu, dadjá Kjerkol.

Jobbvinner prošeavtta doarjun

Ráđđehus árvala maiddái njeallje miljovnna kruvnno doaibmabidjui Jobbvinner (ks.no), mii lea nationála prošeakta, man ulbmil lea rekrutteret ja doalahit buohccidivššáriid ja dearvvašvuođabargiid suohkaniid dearvvašvuođa- ja fuolahusbálvalusain.

– Go mis šaddet dađistaga unnit bargoahkásaččat ja eanet boarrásat, geat dárbbašit divššu ja fuolahusa, de fertet mii nuppástuhttit iežamet. Dat leage maiddái Helsepersonellkommisjonen čielga ávžžuhus. Dasa dárbbašit mii doaibmabijuid nugo Jobbvinnar doarjjan min dearvvašvuođabálvalusa bargui, deattuha Kjerkol.

Ásaha ođđa bagadanbálvalusa

Ráđđehus árvala maiddái logi miljovnna kruvnno ođđa ortnegii, man ulbmil lea bagadit studeanttaid ja bargiid suohkaniid dearvvašvuođa- ja fuolahusbálvalusain. Doalahit easkaoahppan bargiid ja addit sidjiide buori álggu bargoeallimis lea áibbas dárbbašlaš dasa ahte bisuhit buriid bálvalusaid.

– Gelbbolašvuohta, rekrutteren ja ođđa teknologiija geavaheapmi lea dárbbašlaš vuođđun dasa ahte nagodit sihkkarastit ávddalaš ja oadjebas boarrásiidfuolahusa miehtá riikka. Min evttohusain stáhtabušeahta bokte leage juste dat ulbmil, dadjá Kjerkol.