Ráđđehus nanne psyhkalaš dearvvašvuođa ja gárrendillesuorggi barggu 360 miljovnna kruvnnuin

– Dáinna mii čuovvulit psyhkalaš dearvvašvuođa nannema plána, man ovddideimmet ovdal geasi, ja joatkit seammás áŋgiruššama diimmá bušeahttajuolludeamis. Sii, geain leat psyhkalaš hástalusat ja gillámušat dahje gárrenmirkováttut, galget oažžut buori veahki, mii lea álkit olámuttus, lohká dearvvašvuođa- ja fuolahusministtar Ingvild Kjerkol.

Son čujuha ahte psyhkalaš váttut ja gillámušat rehkenastojuvvojit leat min stuorámus dearvvašvuođahástalusaid gaskkas. Nannenplánas leat golbma áŋgiruššansuorggi:

• Dearvvašvuođaovddideaddji ja eastadeaddji psyhkalaš dearvvašvuođabargu
• Buorit bálvalusat doppe gos olbmot ásset
• Fálaldat olbmuide geain leat bistevaš ja máŋggabealat dárbbut

– Mii fertet buorebut eastadit sihke psyhkalaš dearvvašvuođaváttuid ja gárrendilleváttuid, nannet psyhkalaš dearvvašvuođa ja fuolahit buori ja olahahtti veahki sidjiide geat dan dárbbašit, lohká Kjerkol.

Dan 250 miljovnnas galgá 150 miljovdna mannat njuolga suohkaniidda, suohkaniid rámmajuolludusa lassáneami bokte. Ráđđehus addá dáinna lágiin muni lágidit buoret fálaldaga buohkaide – vel jođáneappot. Juolludeami vuođđun lea dárbu suohkandássái ásahit eambbo álkit olahahtti fálaldagaid gárrendilleváttuid ja psyhkalaš dearvvašvuođa hárrái.

100 miljovdna kruvdno galgá mannat ođđa ja nannejuvvon doaibmabijuide, mat leat vuosttažettiin mánáide ja nuoraide, ja olahahtti veahkkedoaimmaide. Ruhta manná earret eará ovdánahttit ja implementeret dustenmetodihka erenoamážit mánáid ja nuoraid guovdu, ovdamearkka dihte eastadandoaimma doppe gos nuorat leat, ja dearvvašvuođastašuvnnaid ja skuvladearvvašvuođabálvalusa nannemii.

– Suohkaniid sisaboađu lasiheami bokte sáhttit mii láhčit dili ásahit eambbo álkit olahahtti fálaldagaid ja bálvalusaid báikkálaš dárbbuid mielde. Buorit ja álkit olahahtti fálaldagat sáhttet sihkkarastit ahte olbmot ožžot veahki árrat, ovdal go váttisvuođat šaddet hui duođalaččat, deattuha Kjerkol.