Moenehtse juktie buerebe ektiebarkoem buektiehtidh båatsoen jïh jåartaburrien gaskem
Ođas | Almmustahtton: 28.01.2025 | Eanadoallo- ja biebmodepartemeanta
Laanteburrie- jïh beapmoedepartemente daan biejjien moenehtsem nammoehtamme mij edtja ovmessie råajvarimmieh raeriestidh juktie buerebe ektiebarkoem buektiehtidh båatsoen jïh jåartaburrien gaskem ektiedimmesne båatsoedajven åarjemes raastese.
Moenehtsen våarome lea barkoe lissieareaalem tseegkedh Fovsen-Njaarken sïjtese. Reerenasse lea juvnehtimmiem våaroemasse bïejeme NIBIO:en salkehtimmesne nuepien bïjre lissieareaalijste, vijriesåbpoe barka dajvine Håmmålsfjellet-Sålekinna Os, Tolga jïh Eengerdaelien tjïeltine. Juktie sjïehteladtedh ihke krievvie Fovsenisnie maahta dajvem daelviegåatoeminie nuhtjedh, lea vihkeles loetemh gaavnedh dejtie haestiemidie mah guhkiem orreme dajvesne jåartaburrien jïh båatsoen gaskem.
Akte ulmie daejnie barkojne tjåenghkies goerkesem sjugniedidh daan beajjetje haestiemidie , jïh leajhtadimmiem tseegkedh göökte vihkeles jielemi gaskem vaeriedajvesne .
Moenehtsen åvtehke lea Gunnar Hæreid, sæjjasadtje staatehaaltoje Vestlaantesne. Moenehtsen jeatjah lïhtsegh leah Marit Meløy, båatsoesaemie jïh Erling Aas-Eng, gaerteneutnije.
- Mov ulmie lea gaajhkesh edtjieh nænnoesåbpoe sjïdtedh daennie prosessesne. Moenehtsen barkoe lea vihkeles, dovne tjåenghkies goerkesem åadtjodh mij maahta leajhtadimmiem tseegkedh, jïh juktie vihties råajvarimmieh buektedh. Moenehtsen laavkedimmie hijvenlaakan sjïehteladta vuekieh gaavnedh mah maehtieh aevhkine sjïdtedh dovne jåartabårran jïh båatsose, laanteburrieministere Geir Pollestad jeahta.
Laanteburrie- jïh beapmoedepartemente galka moenehtsen tjaelemesijjine årrodh. Moenehtse edtja dan reektehtsem deelledh goeven 1. b. 2025 åvtelen.