Várre 887 miljovnna ruvnno orrunviesuid energiijaeffektiviseremii

Várrejuvvo 587 miljovnna ruvnno Enovai doarjjan oahpes ja beaktilis energiijaeffektiviserendoaimmaide orrunviesuin. Viessobáŋkku 300 miljovnna ruvdnosaš doarjjaortnet galgá mannat doaimmaide suohkaniid láigoviesuin, fuolahusásodagain ja buhcciidruovttuin.

Ráđđehusáigodagas lea várrejuvvon ja geavahuvvon birrasiid 3,7 miljárdda ruvnno energiijaeffektiviseremii ja beaivvášenergiijai orrunviesuin ja fidnovisttiin Enova ja Viessobáŋkku olis.

– Dát ráđđehus lea hui bajás vuoruhan energiijaeffektiviserema. Energiijaeffektiviseren dagaha sihke buoret ássankvalitehta ja unnida elrávdnjerehkega sidjiide geat čađahit doaibmabijuid. Beaktilet energiijageavaheapmi nanne maid fápmo- ja beaktobalánssa, ja geahpida geavaheddjiid noađi áigodagain goas leat alla elrávdnjehattit.  Seammás lea dat hui buorre vuohki eastadit divrras resurssaid háskkideami, lohká energiijaministtar Terje Aasland.

Doarjja orrunviesuide galgá boktit dihtomielalašvuođa energiijaseastima vejolašvuođaid hárrái ja oažžut olbmuid dahkat jierpmálaš válljejumiid mat unnidit elrávdnjerehkega. Doarjja Enova bokte čađahuvvo sierra doaibmabidjun ja sáhttá adnot teknologiijaide ja čovdosiidda maid mii diehtit doibmet bures.

Ráđđehus lea álggahan hábmet ođđa stivrenšiehtadusa Enovain mii galgá gustot áigodahkii 2025-2028. Enova lea guovddáš dálkkádat- ja energiijagaskaoapmi oččodan dihte servodaga unnidit nuoskkideaddji gássaluoitimiid.

Energiijabealli šaddá deaŧalaš oassi boahttevaš stivrenšiehtadusas, ja Enova galgá doarjut energiija- ja beaktobalánssa nanusmahttima mihttomeari.

Ain mearkkašahtti doarjja Viessobáŋkku doarjjaortnega bokte

Ráđđehus árvala juolludit 300 miljovnna ruvnno Viessobáŋkku energiijadoaibmabijuid doarjagii  suohkaniid láigoviesuide, fuolahusviesuide ja buhcciidruovttuide. Doarjjaortnet lea guovddáš doaibmabidju ráđđehusa energiijaeffektiviserenáŋgiruššamis ja suohkanat lea áŋgirit ávkkástallan ortnega. Dán rádjái leat oktiibuot 110 suohkana ožžon doarjaga.

Ráđđehus atná deaŧalažžan ahte Viessobáŋkku doarjjaortnet maiddái doaibmá dainna lágiin ahte viessodoalut main leat vuollegis sisaboađut sáhttet oažžut eanet energiijaeffektiiva viesuid. 2024:s oaččui Viessobáŋku láidehussan vuoruhit láigoviesuid maid suohkanat eaiggáduššet ja dát láidehus joatkašuvvá 2025:s.

Seammás árvala ráđđehus ruđaid Norgga čázádat- ja energiijadirektoráhttii (NVE/NČE) ja Huksenkvalitehta direktoráhttii (DiBK) čuovvolit energiijaeffektiviserema ovddideami.