Undredála máilmmiárbeboanddat ožžot nationála kultureanadatbálkkašumi 2024
Ođas | Almmustahtton: 30.08.2024 | Eanadoallo- ja biebmodepartemeanta
Guhtta dállodoalu ožžot bálkkašumi kultureanadaga gáhttenbarggu ovddas máilmmiárbegilis Undredal nammasaš báikkis Sognas.
![Undredal](/contentassets/0d62e14ae3f648eda22d9e0e1e29c03a/prismottakarar-undredal2.jpg?preset=article&v=2094385389)
- Máŋgga geardde leat máilmmi árbevierroboanddat leamaš nationála kultureanadatbálkkašumi árvvolaš evttohasaid gaskkas, garra gilvvus eará evttohasaiguin, cealká stádačálli Wenche Karin Westberg. Lea Norgga Kulturárbi ja Eanandoallo- ja biebmodepartemeanta mat jahkásaččat válljeba bálkkašumi vuoiti.
Unna gilážis Undredalas Aurland suohkanis lea hui erenoamáš vistebiras gos leat smávva muorravisttit lahkalagaid, riikka unnimus stáhpegirku ja rikkis biologalaš valljivuohta nugo ládjo- ja guohtoneatnamat. Dat lea maid oassin Oarje-Norgga vuotnaeanadaga máilmmiárbeguovllus, mii lea čállojuvvon UNESCO máilmmiárbelistui.
- Gáicadoallu ja vusten leat váldoealáhusat gilis, ja dat leat heivehuvvon eanadahkii.
![Vuostták Undredálan](/contentassets/0d62e14ae3f648eda22d9e0e1e29c03a/foto-6-ost-til-modning2.jpg?preset=article&v=-309855696)
Ceakko rámat ja fielttit guođohuvvojit ja láddjejuvvojit juohke jagi.
- Mun lean oaidnán ahte lea stuorra beroštupmi eanadoallošiehtadusa máilmmiárberuđaide, ja dat doibmet nugo mun háliidan. 2008:s ásahuvvui juo dát ortnet. Dat galggai váikkuhit eanandoalu nannema, earret eará bisuhan dihte árvvuid máilmmiárbeguovllus, dadjá Westberg. Westberg muitala maid ahte ruhta mii láhčá dili bisuhit áidnalunddot eanadoalloeanadagaid lassánii dán jagi.
![Aurlandvuotna](/contentassets/0d62e14ae3f648eda22d9e0e1e29c03a/foto-3-aurlandsfjorden-fra-brygga.jpg?preset=article&v=-310756233)
- Mun jurddašan erenoamážit dán birra go mun dán jagi áiggun ovddidit stuoradiggedieđáhusa dan birra movt Norga čuovvula máilmmiviidosaš luonddušláddjivuođalága, mas maiddái eanandoalus lea dehálaš rolla.
- Gáhttet kultureanadaga eanadoalus mas leat mávssolaš biraskvalitehtat, gáibida ulbmillaš áŋgiruššama máŋggaid buolvvaid mielde ja guhkes áiggi badjel, dadjá Westberg.
Kultureanadatbálkkašupmi vuoiti oažžu 50.000 ruvnno ja muoras vaddjojuvvon gráfalaš prentosa, maid Hans Normann Dahl lea ráhkadan. Bálkkašupmi geigejuvvui vuosttaš geardde 2007:s.
Bálkkašumi vuoitit leat dát dállodoalut: Vetlereina, maid Bernat Alarcon Underdal ja Maris Alarcon Underdal jođiheaba, Reina, maid Atle Underdal Borlaug ja Anna Elise Borlaug jođiheaba, Nigarda, maid Trude Høiby Underdal ja Tormod Underdal jođiheaba, Turi-Per-dállodoallu, maid Erna Underdal ja Sigbjørn Skarsbø jođiheaba, Hjellum, maid Nils Hjellum jođiha ja Hjødlo, maid Jannicke Hjellum jođiha.