Spesialistadearvvašvuođabálvalusossodat

Spesialistadearvvašvuođabálvalusa stáhtalaš eaiggátvuohta lea juhkkojuvvon njealji regiovnnalaš dearvvašvuođadoaimmahahkan (RHF). Guđesge dán njealji regiovnnalaš dearvvašvuođadoaimmahaga vuolde leat buohcciviesut ja eará spesialistadearvvašvuođabálvalusat organiserejuvvon sierra dearvvašvuođadoaimmahahkan (HF). Juohke regiovnnalaš dearvvašvuođadoaimmahat doaibmá sihke vuollásaš dearvvašvuođadoaimmahatjoavkkuid eaiggádin ja guoddá dearvvašvuođabálvalusaid «fuolahan»-ovddasvástádusa regiovnna álbmoga hárrái. Dearvvašvuođadoaimmahagat leat iešheanalaš riektesubjeavttat main leat sierra stivrrat regiovnnalaš ja báikkálaš dásis.

Spesialistadearvvašvuođaossodat galgá eaiggátvuođa gaskaomiid aktiivvalaš geavahemiin sihkkarastit ahte dát njeallje regiovnnalaš dearvvašvuođadoaimmahaga stivrejuvvojit strategalaččat ja doaimmalaččat. Ossodagas lea earret eará ovddasvástádus ráhkkanahttit doaimmahatčoahkkimiid ja čuovvolit stivrengáibádusaid mat gaskkustuvvojit čoahkkimiin. Ossodagas lea erenoamáš ovddasvástádus organisatoralaš ja ekonomalaš stivrengáibádusaid ja rámmaeavttuid hárrái.

Ossodagas lea ovddasvástádus ruhtadit spesialistadearvvašvuođabálvalusa ja fuolahit diŋgomiid mat bohtet regiovnnalaš dearvvašvuođadoaimmahagaide jahkásaš juolludemiid oktavuođas, ja maiddái fuolahit buori diehtojuohkima spesialistadearvvašvuođabálvalusa birra ja čuovvolit láhkamearrádusaid. Ossodagas lea bajimus ovddasvástádus somáhtalaš ja psyhkalaš dearvvašvuođas spesialistadearvvašvuođabálvalusain, ja fágaidrasttideaddji spesialiserejuvvon gárrendilledivššus.

Dása gullá maiddái kvalitehtaovddideapmi, pasieantasihkarvuođabargu, geavaheddjiid mielváikkuheapmi, gealbodoaibmabijut ja iešguđet rievttálaš gažaldagat. Ossodagas lea ovddasvástádus čuovvolit spesialistadearvvašvuođabálvalusa njeallje váldobarggu, mat namalassii leat divššohasdikšu, dutkan, oahpaheapmi ja divššohasaid ja oapmahaččaid bagadallan, ja galgá dasa lassin koordineret dutkan- ja gealbodoaimmaid, oahpaheami ja departemeantta bargiid. Ossodagas lea maiddái ovddasvástádus guovddáš váikkuhangaskaomiide ja stivrenvuogádagaide mat ovddidit ceavzilis dearvvašvuođabálvalusa, nu go vuoruheamit ja nationála bálvalusat.

Dasto lea ossodagas ovddasvástádus bargat dálkasiid ja medisiinnalaš reaidduid mihttomeriiguin ja váikkuhangaskaomiiguin. Dát čuovvoluvvo ee. njuolggadusbarggu, jahkásaš bušeahttaproseassaid ja Medisiinnalaš buktagiid direktoráhta fágalaš stivrema bokte.

Ossodatjođiheaddji: Ekspedišuvdnahoavda Cathrine Meland

Ossodaga čuovvovaš sekšuvnnat:

• Organiserema ja stivrema juogus

  Juhkosa barggut čatnasit stáhtaráđi regiovnnalaš dearvvašvuođadoaimmahagaid stivranammademiid ráhkkanahttimii, ja daid čuovvoleapmái. Juogus ráhkkanahttá muđui regiovnnalaš dearvvašvuođadoaimmahagaid eaiggátstivrema ja juhkosa fágasurggiid stivrengáibádusaid čuovvoleami.

• Ekonomalaš stivrema sekšuvdna

  Juhkosis lea ovddasvástádus čuovvolit buohcciviessoekonomiija ja loanaid buohcciviesuid stuora investerendoaimmaide ja ráhkadit evttohusaid stáhtabušeahttaproseassa oktavuođas.

• Ruhtadeami ja stivrema juogus

  Juhkosis lea ovddasvástádus gozihit sierra ortnegiid buohcciviessolágideamis, nugo doaibmavuđot ruhtadeami ja ovttasdoaibmama ja daid ovdánahttima, ja čuovvolit dieđihemiid doaimmaid ja kvalitehta birra, ee. vuordináiggi ja áigemeari rihkkumiid. Sekšuvnnas lea maiddái ovddasvástádus diŋgojumiide mat bohtet regiovnnalaš dearvvašvuođadoaimmahagaide jahkásaš juolludeami oktavuođas.

• Dálkkasjuogus

  Dálkkasjuhkosis lea ovddasvástádus reguleret buktagiid ja dálkasiid ja medisiinnalaš rusttegiid buktagiid buvttadeaddji-, gálvolágideaddji- ja vuovdidásis, klinihkalaš dutkamušaid rájes gitta geavaheaddji rádjai.

• Gelbbolašvuođa, dutkama ja innovašuvnna juogus

  Juhkosa ovddasvástádussuorgái gullet dutkan, innovašuvdna, spesialistadearvvašvuođabálvalusa dearvvašvuođaealáhus, persovdnaheivehuvvon dálkasat, autorisašuvdna- ja dohkkehanortnegat, dearvvašvuođabargiid spesialista- ja joatkkaoahppu, pasieantasihkarvuohta, vuoruheamit, nationála bálvalusat, ja vel koordineret departemeantta barggu gelbbolašvuođa, oahpuid ja bargiid, pasieantasihkarvuođa ja dutkama hárrái.

• Dearvvašvuođafágaid juogus

  Dearvvašvuođafágaid ovddasvástádussuorgái gullá viidáseappot ovdánahttit spesialistadearvvašvuođabálvalusa somatihka, psyhkalaš dearvvašvuođasuddjema ja fágaidrasttildeaddji spesialiserejuvvon gárrendilledivššu dáfus.