Ráđđehus bidjá dál árjjaid lasihit sámegiela geavaheami almmolaš ávvosis ja juohkit eambbo dieđuid sámi dilálašvuođaid birra. Dása lea Ráđđehus várren 2,5 miljovnna kruvnnu. Dasa lassin lea várren 1,3 miljovnna kruvnnu seailluhit, gárgedit ja ovddidit sámi identitehta, kultuvrra ja servodateallima.

- Gielda- ja guovlodepartemeanta lea addán ruhtajuolludusaid iešguđetlágan projeavttaide, mat visot galget čuovvolit Ráđđehusa stuorradiggedieđáhusa nr. 33 juksanmeriid. Erenoamážit anán sámi mánáid ja nuoraid vuoruheami positiivvalažžan, dadjá Gielda- ja guovlodepartemeantta stáhtačálli Anders Eira. – Mánáid ja nuoraid lea deaŧalaš bidjat guovddážii vai sámi identitehta seailu.

RUĐAT SÁMI MÁNÁIDE JA NUORAIDE

30 000 kruvnnu leat juolluduvvon Arctic Youth Camp:i 2003, mii dollojuvvo Olmmáivákkis suoidnemánus, 90 000 kruvnnu nuoraidfestiválii Márkomennui Evenáššái, 30 000 kruvnnu ”Tjaktjasijddaj” man Sámi Váhnenfierpmádat Romssas doallá sámi mánáide ja nuoraide, ja 110 000 kruvnnu sámegiel sárgunráiddu olggosaddimii.

SÁMEGIELLA JA IT DORJOJUVVO

Deanu gielda oaččui ovdalis dán jagi 300 000 kruvnnu sámi juridihkalaš terminologiija projektii. Stuorámus eaŋkilprojeakta lea 1 miljovnna kruvnnu ovttasbargoprojektii Sámedikkiin, man ulbmilin lea lasihit dieđuid sámi dilálašvuođaid birra ja oaččohit eambbosiid logahit iežaset sámi jienastuslohkui. Sámediggi lea lassin vel ožžon 250 000 kruvnnu joatkit barggu iežas eSápmi-plánain. Viidáseappot leat várrejuvvon 400 000 kruvnnu sámi čálamearkačoahki ja IT – samiIT – gelbbolašvuođavuođu ceggemii ja doibmii. Várdobáiki giellaguovddáš Evenáššis oažžu 90 000 kruvnnu giellaprojektii Luobágii, ja Mearrasámi gelbbolašvuođaguovddáš oažžu 100 000 kruvnnu giella- ja kulturprojektii Porsáŋgguvutnii.

RÁĐĐEHUS ÁIGU OVDDIDIT DUOJI

Duodjeinstituhtta Guovdageainnus oažžu 230 000 kruvnnu gárgedit Web Portal Duodje Info – internehttii vuođđuduvvan čovdosa duodjebuktagiid vuovdima ja dieđiheami váste.

- Dát lea hui deaŧalaš doaibmabidju mii galggašii lasihit duoji jođu ja dahkat sámi duodjebuvttadeami gávppálažžan. Duodjeinstituhtta oažžu dáinna lágiin vejolašvuođa ollašuhttit áigumušaidis buoridit duodjeealáhusa gánnihahttivuođa, dadjá stáhtačálli Eira.

JULEVSÁMI AVIISAFÁLALDAT GALGÁ ÁLGGAHUVVOT

Báikkálaš aviisa NordSalten oažžu 200 000 kruvnnu doaimmahit julevsámegiel aviisafálaldaga 2003s.

- Mun doaivvun ahte julevsámegiella dáinna doaibmabijuin sáhttá eambbo čalmmustuvvot ja ealáskahttojuvvot. Sámi máŋggadáfotvuhtii lea positiivvalaš ahte boahtá maiddái sámi aviisafálaldat julevsámegillii. Danne doarju Gieldadepartemeanta dán fálaldaga álggaheami, dadjá stáhtačálli Anders Eira.