Gielda- ja guovlodepartemeanta lea juolludan miljovnna kruvnnu ovttasbargoprojektii Sámedikkiin. Prošeavtta mihttumearri lea earret eará lasihit dieđuid sámi dilálašvuođaid birra, ja oaččohit eambbosiid čálihit iežaset sámi jienastuslohkui.

Sámediggi ja Gielda- ja guovlodepartemeanta ruhtadit prošeavtta. Prošeakta galgá doaibmat golbma jagi ja máksá sullii 3,5 miljovnna kruvnnu. Sámediggi jođiha ja ovddasvástida prošeavtta.

- Ráđđehussii lea deaŧalaš bargun vuosttaldit negatiiva miellaguottuid ja gierdameahttunvuođa sámiid vuostá dakko bokte, ahte lasihit dieđu sámi dilálašvuođaid birra sihke stáhtahálddahusas ja álbmogis, dadjá stáhtačálli Anders Eira. Prošeavtta váldoulbmilin lea lasihit informašuvnna sámiid ja sámi servodateallima birra ja vuosttaldit negatiiva miellaguottuid sámiid vuostá.

– Mii háliidit maiddái eanet sámiid čálihit iežaset sámi jienastuslohkui, dadjá Eira.

Máŋga guorahallama, maid earret eará Norsk Gallup ja Statskonsult leat ráhkadan, leat projeavtta fágalaš duogážin. Doaibmabijut leat erenoamážit oaivvilduvvon nissoniidda ja nuoraide. Dál leat dušše 36 proseantta sámi jienastuslogus nissonolbmot.

– Dan dihte lea erenoamáš deaŧalaš oaččohit eambbo nissonolbmuid beroštit politihkas. Dušše čiežas Sámedikki 39 áirasis leat nissonolbmot ja dat lea beare unnán, dadjá stáhtačálli Eira.