Ráđđehus evttoha nuppástusaid sámeláhkii čuovvolan dihte Sámedikki evttohusa, man mielde sámi jienastuslohku galggašii buorebut fievrriduvvot.

- Dát evttohus dagaha mearkkašahtti buoridemiid ja álkidahttimiid. Ii oktage suohkan šat dárbbaš fievrridit ja hálddašit sierra sámi jienastuslogu iežas suohkanis. Sámedikkis šaddá ovddasvástádus fievrridit oktasaš jienastuslogu, ja maid fievrridit jienastuslogu suohkaniid mielde ja kvaliteahttasihkkarastit jienastuslogu, dadjá gielda- ja guovlodepartemeanttaministtar Erna Solberg.

Evttohusa mielde galgá olmmoš, gii dáhttu čálihuvvot sámi jienastuslohkui, Sámedikkis dan gáibidit. Dat suohkanat mat ožžot dakkár gáibádusaid, berrejit oktiilaččat daid sáddet Sámediggái. Sámediggi áigu ovttasbargat Álbmotlogaheami guovddáškantuvrrain ja logahit dáid guovddášlaš álbmotregistarii, ja fuolahit ahte suohkanat ožžot ođasmahttojuvvon ja loahpalaš jienastuslogu sámediggeválggaide.