Stáhtačálli Anders J. Eira Gielda- ja guovludepartemeanttas oassálastá ovttas sámediggepresideanttain Sven-Roald Nystøin Árrana - julevsámi guovddáža nuppi huksenceahki almmolaš rahpamis bearjadaga borgemánu 29. beaivvi.

Stáhtačálli lea hui duhtavaš ahte Árran julevsámi guovddáža huksen dál lea čađahuvvon, ee. Gielda- ja guovludepartemeantta 5 miljon-ruvdnosaš juolludemiin.

Muhto Eira addá Divttasvuona báikkálaš áŋgiris olbmuide váldogutni das ahte dát bálggesčuovgi ásahus julevsámi giela ja kultuvrra bisuheamis ja ovddideamis dál lea ollašuhttojuvvon.

- Julevsámi kultuvra Norggas lea dehálaš oassi sámi máŋggabealatvuođas maid Ráđđehus háliida ovddidit. Dán barggus lea Árran áibbas guovddážis, lohká Anders Eira.

Eira lasiha ahte Árranis ii leat dušše báikkálaš ja riikkalaš mearkkašupmi, muhto dat maiddái veahkeha bisuhit kultuvrralaš máŋggabealatvuođa riikkaidgaskasaš oktavuođas.

Čalmmusteapmi lágiduvvo bearjadaga borgemánu 29. beaivvi diibmu 1200.

• Pressemeldingen på lulesamisk
• Pressemeldingen på norsk