Ráđđehus lea juolludan 6 milljovnna ráhkadahttit sámi divvunprográmma elektrovnnalaš teakstameannudeapmái. – Mun lean hui movttet go mii leat dál ollislaččat ruhtadan dán deaŧalaš prošeavtta, dadjá stádačálli Anders J. H. Eira Gielda- ja guovludepartemeanttas.

Sámegiela nannen lea guovddáš oassin ráđđehusa sámepolitihkas. – Sámegiella galgá leat oidnosis ja geavahusas almmolašvuođas. Mii galgat sáhttit atnit giela ja earenoamážit danne lea deaŧalaš láhčit dili dainna lágiin ahte sáhttá geavahit sámegiela IKT-oktavuođas. Danne bargá Ráđđehus garrasit dan ala ahte duohtan dahkat dan, dadjá Eira.

Dat teknologiija maid dát prošeakta galgá ráhkadit – grammatihka- ja riektačállindárkkisteami, sátnejuohkinprográmma ja synonymasátnegirjji – šaddá árvitmeahttun deaŧalaš reaidun sámegiela seailluheamis ja ovdánahttimis. Divvunprográmma sámegielas boahtá ávkin juohke sámegielat dihtorgeavaheaddjái, ja lea okta dain buoremusain mii sáhttá dahkkojuvvot dan várás ahte ain bisuhit sámegiela ealli giellan.

-Sámi geavaheaddjit leat beare unnán ja danne lea maid márkan beare unni, ii ge dalle gánnát márkanoasálastiide ráhkadit daid sámi IKT-čovdosiid maidda livččii dárbu. Danne lea deaŧalaš ja riekta Ráđđehusas leat mielde heaittiheame dieid váilevašvuođaid márkanis dakko bokte ahte eiseválddit mákset muhtin oasi daid čovdosiid ráhkadangoluin. Ja dat lea rievttes vuohki movt atnit almmolaš ruđaid go galgat unnitloguálbmotgiela seailluhit ja ovdánahttit, dadjá stádačálli Eira.

Sámediggi galgá doaimmahit dán máŋggajagát prošeavtta, ja dat juolluda ieš 5,3 milljovnna ruvnno dása. Ráđđehusa juolludeamit bohtet golmma departemeantta bokte: Kultur- ja girkodepartemeantta, Oahpahus- ja dutkandepartemeantta ja Gielda- ja guovludepartemeantta.

Juolludeapmi lea oassin ráđđehusa barggus das ahte lasihit sámegiela geavaheami, earret eará almmolaš hálddahusas. Ráđđehus lea aiddo rahpan sámegielat Odin-siidduid. Ráđđehus lea maid mearridan ahte stáda etáhtat galget árvvoštallat iežaset dárbbu sámegielat veahkkeneavvuide iežaset dihtorvuogádagain. Buot almmolaš registarat galget sáhttit atnit sámegielat bustávaid ja mihttomearrin lea ahte dieđuid juohkin registariid gaskkas galgá doaibmat áiggi vuollái, maiddái sámi namaiguin ja bustávaiguin, loahpaha stádačálli Anders J. H. Eira.