Ráđđehus ovddidii odne láhkaevttohusa mii mielddisbuktá ahte Sámediggi oažžu njeallje ođđa áirasa. Seammás sáhttá Sámediggi gáibidit 40 proseantta sohkabealjuogu.

Láhkarievdadusain oažžu Sámediggi 43 áirasa. Dat njeallje ođđa áirasa mannet daidda válgabiiriide gos leat eanemus dohkkehuvvon jienat. Rievdadus evttohuvvo čađahuvvot 2005 válggaid rájes.

Rievdadeapmi mielddisbuktá eambbo vuoiggalaš válgaortnega Sámediggái, dan bokte ahte erohusat jienaid dáfus mat leat guđege sámediggeáirasa duogábealde šaddet unnibut go dál leat, lohká stáhtaráđđi Erna Solberg. – Bellodagain ja organisašuvnnain mat leat válggas lea ovddasvástádus sihkkarastit ahte sohkabealit leat dássedit ovddastuvvon, muhto mii evttohit ahte Sámediggi ieš sáhttá mearridit njuolggadusaid sohkabealdássema birra válgalisttuin.

Gielda- ja guovlodepartementa juolludii dán jagi 300 000 ruvnno Sámediggái ásahit ekspeartalávdegotti mii galgá viidát árvvoštallat iešguđetge beliid sámediggeválggaid oktavuođas. Čielggadeapmi sáhttá leat vuođđun vejolaš ođđa rievdademiide válgaortnega dáfus ovdal 2009 válggaid.

Departementa juolludii maiddái 230 000 ruvnno Sámedikki kampánjii man ulbmi lea buoridit nissonovddasteami Sámedikkis 2005 válggaid oktavuođas. Kampánja galgá addit listtuide ovddasvástádusa lasihit nissonovddasteami Sámedikkis válggaid oktavuođas, bargat dan ovdii ahte eambbo nissonat movttiidahttojuvvojit searvat listtuid vuosttašsadjái ja ahte ásahuvvo nissonfierpmádat.